Një fëmijë 12 vjeç ka mbetur i plagosur mëngjesin e sotëm në një aksident ku janë përfshirë dy motoçikleta, në fshatin Xarë të Konispolit.
Fëmija ishte nën drejtimin e një motori (edhe pse sipas legjislacionit në fuqi nuk ka ende moshën e lejuar për të drejtuar një mjet të tillë), që është përplasur një tjetër motoçikletë. Për pasojë, 12-vjeçari është plagosur rëndë, ndërsa personi tjetër i përfshirë në aksident, një 27-vjeçar, është lënduar lehtë.
“Rreth orës 07:45, janë përfshirë në një aksident rrugor dy motomjete që drejtoheshin nga shtetasi A.B., 27 vjeç dhe nga një i mitur 12 vjeçar me iniciale A.B. Si pasojë e përplasjes, i mituri 12-vjeçar ka marrë dëmtime të rënda dhe ndodhet në spitalin e Sarandës, ndërsa shtetasi A.B., 27 vjeç, është dëmtuar lehtë”, njoftoi policia.
Në vendngjarje ndodhet grupi hetimor dhe po punon për zbardhjen e plotë të rrethanave të ngjarjes, shtuan të njëjtat burime.
