Përveç familjarëve, qytetarë janë mbledhur para ambienteve të Gjykatës së Fierit, ku këtë të Enjte është caktuar të jepet masa e sigurisë për Klodian Çalamanin. Në prononcime të dhënë për gazetarët, të revoltuar, ata thanë se nuk kanë siguri dhe kërkuan dënim me vdekje për 38-vjeçarin i cili vrau 8-vjeçarin Mateo Vasia.
“Kam tre fëmijë. Ku jetojmë ne këtu o zotëri, ça do bëhet këtu. Unë jam qytetar fierak. Largoheni, Digjeni. Këtu s’ka sindikata. Këtu s’ka shtet”, u shpreh i revoltuar një qytetar.
“Po më qan zemra, kemi nipër e mbesa. Kemi frikë, ça bën ky shtet. Unë si nënë do ta heq zvarrë. Këtu duhet të jenë qytetarët e Fierit për qytetarët e tyre. Të varen si ata të Libofshës, që u vranë. Prej gjuhe të varet”, tha një grua e moshuar, duke iu referuar dënimit të fundit me vdekje dhënë në vendin tonë.
“S’ka të drejtë të hajë ai bukë me taksat tona”, u shpreh një tjetër, duke iu referuar qëndrimit në burg të 38-vjeçarit.
“Unë kam katër fëmijë, duhet ta kishin ekzekutu që mbrëmë”, u shpreh mes lotësh një tjetër qytetar.
Dënim me vdekje kërkuan dhe të afërm e familjarë të 8-vjeçarit të vrarë.
Seanca e masës së sigurisë për Çalamanin ishte planifikuar të zhvillohej në orën 10 të kësaj të Enjteje. Por për shkak të situatës së tensionuar jashtë ambienteve të gjykatës, raportohet se po shqyrtohet mundësia për anulimin e seancës.
Më herët, familjarë të Mateos u futën me forcë në ambientet e gjykatës.
