Dënimi me vdekje, kur Strasburgu të bllokon “ulërimën e shpirtit”

Nga BoldNews.al

Prindërit dhe familjarët e 8-vjeçarit Mateo Vasiu kanë të gjithë të drejtën e Zotit të kërkojnë dënimin me vdekje të Klodian Çalamanit, 38-vjeçarit që i mori jetën djalit të tyre të mitur.

Banorët e Greçallisë kanë gjithashtu të drejtën që të reagojnë me forcë dhe të kërkojnë varjen e Çalamanit, për krimin makabër.

Opinioni publik, i revoltuar nga krimi horror që ndodhi pasditen e të Martës në zonën rurale të Fierit, ka lëshuar revoltën njerëzore, ku kërkon dënimin kapital për autorin e ngjarjes monstruoze.

Nuk ka askush në këto orë që të mos jetë i tronditur nga vdekja e dhunshme e Mateos.

Dhe, nga të gjithë vjen “ulërima e shpirtit” që Klodian Çalamani të dënohet nga institucionet shtetërore me largim nga kjo botë, pasi i mori jetën një ëngjëlli, të cilit i mbetën shumë ëndërra e lojra pa përfunduar.

Por, përballë kësaj revolte gjendet ligji i ftohtë, i shkruar me të zezë në të bardhë, i cili bllokon revoltën.

Në vitin 1995, Shqipëria nënshkroi në Strasburg Konventën e Këshillit të Europës dhe Anekset plotësuese të saj.

Në një prej këtyre Anekseve, i miratuar në vitin 1983 dhe i ratifikuar nga Parlamenti i vendit tonë 25 vite më parë, parashikohet;

LEXO EDHE  Moti i keq, trageti me 129 pasagjerë nuk arrin të ankorohet në portin e Vlorës

“Dënimi me vdekje hiqet. Askush nuk mund të dënohet me një dënim të tillë, as të ekzekutohet”.

Në bazë të kësaj Konvente, Shqipëria miratoi edhe ndryshimet përkatëse në Kodin Penal, në të cilin u vendos që asnjë shtetas shqiptar nuk do të dënohej me vdekje e do të ekzekutohej, pavarësisht krimit të rëndë që kryen.

Por, çfarë mund t’i thuhet nënës dhe babait të Mateos për këtë Konventë!

Çfarë mund t’u thuhet familjarëve të tij, shokëve të tij të vegjël që në bankat e shkollës këtë të Mërkurë vendosën një tufë lule për shokun dhe mikun e tyre të larguar në mënyrë barbare nga kjo jetë?!

Klodian Çalamani dhe shumë të tjerë mostra të singjashëm të tij do të vijojnë të marrin frymë në këtë jetë, falë kësaj Konvente.

Një letër e bardhë me shkrim të zi, e cila bllokon “ulërimën e shpirtit” të çdo familje që humbet fëmijën në mënyrën më makabre të mundshme dhe të të gjithë shoqërisë që këtë natë e ka kaluar me tallaze të forta shpirtërore për atë që ndodhi në Gracell të Fierit.