Erion Braçe, deputet i PS, prej javësh po shigjeton Qeverinë Rama, duke marrë rolin e një kritiku apo akuzuesi. Së fundmi nga foltorja e Parlamentit, Braçe ka kritikuar Qeverinë sa i përket qasjes së saj ndaj kategorive të njerëzve në nevojë, për të cilat ai paraqiti edhe 2 raste konkrete të personave të cilët ishin me aftësi të kufizuar dhe u ishte ndërprerë ndihma ekonomike nga shteti.
Braçe tha se politikat e ndjekura po godisnin rëndë bujqësinë dhe bujqit të cilët sipas tij po shtrydhen nga skema e TVSH-së të cilën e konsideroi si të pabarabartë.
“Keni bërë mirë që keni nisur të ulni deficitin primar. Keni bërë mirë që keni nisur të ulni borxhin publik, keni bërë mirë që këtë vit do paguajmë 250 lekë investime për cdo 100 lekë borxh.
Qeveria dhe konsumi i tillë ishte zgjedhja jonë, ajo që mua më shqetëson është efektiviteti i financave publike, transparenca jo e plotë, dëmtimi i garës, vendosja e pabarazisë, kur duhet të ishte një instrument që zgjedh ndershëm. Rroga do paguajmë 900 milionë dollarë. Rroga në sektorin publik është rritur. Por a e justifikojnë adminsitratorët tanë këtë? Unë mendoj se jo.
Për arsimin parauniversitar po financojmë miliona euro, por mendoj se është gabim sepse njëra është disiplina e cila po përdoret krahasuar me kurrikulën që përdoret në shkollat universitare.
Unë e kap veten gafil, duke parë në mjetet teknologjike ku u bëhet thirrje të rinjve për të bërë sa më shumë para. Ëndrrat me para ta shpifin, po ua them me plot gojën.
Ajo që dua të them për paketën fiskale, ajo që mua më dhemb është bujqësia dhe bujqit. E keni nisur në 2018 goditja dhe vazhdon goditja me skemën e TVSH-së të pabarabartë në hyrje dhe në dalje, vazhdon goditja e habitshme edhe në prodhimin e bujqve. Ndërkohë që godasim bujqit nuk prekim përjashtimet për ndërtuesit. Sot që flasim ndërtesat në zonë rezidenciale nuk i prekim. Sot flasim gjithë ditën për taksën mbi qumështin pluhur por nuk flasim për dëmin që po u bëhet bujqve për prodhimin e qumështit. Të ndërtojmë një sistem, të krijojmë bursën që bujku ta dijë sesa ta shesë prodhimin e tij. Të mbajmë përjashtimin në inputet bujqësore, të clirojmë tregun nga matrapazët dhe karteli i inputeve bujqësore”, tha Braçe.
Fjalët apo kritikat e Braçes mund të kishin më shumë vlerë nëse gjatë kohës që mbante postin e zv. Kryeministrit të paktën nuk do të firmoste vendime që godisnin ato shtresa për të cilat sot shfaqet si i prekur, apo do të favorizonin oligarkinë me fshatrat turistikë.
