Deputeti demokrat Gazment Bardhi deklaroi këtë të Martë nga foltorja e Kuvendit se Partia Demokratike do të votojë kundër “paketës fiskale të Edi Ramës”.
Teksa e cilësoi një paketë fiskale kundër shtresës së mesme, ai tha se PD do të votojë kundër buxhetit të oligarkëve dhe klientëve të Edi Ramës.
“Kjo nuk një votë kundër e opozitës, thjesht për të votuar kundër qeverisë. Është një votë kundër në emër të shqiptarëve që duan të ikin jashtë vendit”, u shpreh Bardhi teksa nënvizoi se paketa fiskale 2022 është paketë fiskale kundër shtesës së mesme.
Bardhi shtoi më tej se 40% e të punësuarve në Shqipëri nuk do të kenë asnjë lehtësim nga taksat dhe nuk do të ketë rritje pagash dhe pensionesh.
“Një votë kundër borxhit që nuk është përdorur nga ky kryeministër. Kjo qeveri ka marrë borxh në 3 vitet e fundit 3 mln dollarë borxh dhe nuk ka bërë asgjë që t’u shërbejë shqiptarëve. Që jeta juaj të ndryshojë, që të luftojmë korrupsionin na duhet të ndryshojmë qeverinë”, u shpreh Bardhi.
