Kryetari i Partisë Demokratike së Fushë-Krujës, Agron Loka, njoftoi se do i bashkohet “Foltores” që zhvillohet nesër në Fushë-Krujë.
“Themeluesi dhe lideri historik i PD, Sali Berisha do të jetë nesër në qytetin e Fushë-Krujës. Kam kënaqësinë t’ju njoftoj si Kryetar i Degës, se PD e Fushë-Krujës është e bashkuar për t’i rezervuar pritjen që meriton liderit historik të PD, Sali Berisha. Mikpritja për miqtë është tradita dhe amaneti që ne trashëgojmë nga paraardhësit tanë. Ftoj qytetarët të bashkohemi në këtë takim dhe bashkëbisedim historik për fatet e PD. Takimi do të zhvillohet në ambientet e kinemasë ora 17:00,” shkruan ai në një reagim në rrjetet sociale.
Loka ka postuar edhe foto nga vizita e ish-presidentit amerikan, George Bush në Shqipëri, gjatë së cilës ai vizitoi edhe Fushë-Krujën.
Më herët gjatë ditës, Berisha njoftoi se “Foltorja” do të zhvendoset në Fushë-Krujë, ditën e nesërme.
