Edi Paloka, kreu i Këshillit Kombëtar të PD, iu përgjigj sot deklaratave të Sekretarit të Përgjithshëm Gazment Bardhi, i cili ka vijuar edhe sot të deklarojë se firmat nuk ishin dorëzuar dhe bëri thirrje që ish kryeministri Berisha të mos tallej me demokratët.
Paloka në reagimin e tij i ka drejtuar një apel Bardhit të mos fshihej pas pikave dhe presjeve e të mos gjente mundësi për shmangur mbledhjen e Kuvendit Kombëtar.
Ai tha se kriza nuk zgjidhej në këtë mënyrë duke u fokusuar në procedura të pakuptimta duke bërë që të mos ketë asnjë zgjidhje për përcarjen në PD.
“Nuk zgjidhet kriza që po kalojme as duke përsëritur pa fund sllogane pa vlerë e as duke rrotulluar para e mbrapa statutin për tu fshehur.
Po nuk pamë realitetin në sy, po nuk i dhamë zgjidhje problemeve tona, por vazhdojmë të fshihemi pas pikave e presjeve të statutit apo procedurave të sajuara, kjo do të thote të tallesh me vullnetin, shpresën dhe dinjitetin e demokratëve.
Anëtaret e PD nuk kanë hallin se kush do të mbajë zyrat apo karriget në selinë e partisë ndërkohe që ata enden rrugëve nën goditjet e një qeverie e kryeministri monstër!
Demokratët presin që drejtuesit e tyre ti udhëheqin drejt rikthimit të PD në pushtet pasi të kemi rrëzuar këtë regjim antishqiptar e kjo nuk bëhet duke u fshehur.
Vota është në themel të demokracisë! Vota tregon dhe kush është shumicë apo pakicë e pakicës . Vota është dhe zgjidhja për situatën e krizës që po kalojmë. Gjithshka tjetër, “po” është tallje me demokratët”, shkruan Paloka.
