Këshilli i Lartë i Prokurorisë ka mbajtur një qëndrim as pro as kundër lidhur me zgjatjen ose jo të afateve për organet e Vetting, duke ia lënë në dorë Qeverisë dhe Kuvendit vendimin final.
Zgjatja e afateve të organeve të Vetting kërkon një ndryshim Kushtetues, çka do të thotë se mazhoranca e Kryeministrit Edi Rama, duhet të gjejë pikat e takimit me opozitën për të garantuar votat.
E ndërsa Ambasadorja e SHBA në Tiranë dhe ai i BE-së, përkatësisht Yuri Kim dhe Luigi Soreca kanë kërkuar shtyrjen e afateve, socialistët i janë drejtuar Venecias për nismën që kanë paraqitur në Kuvend për ndryshimet Kushtetuese.
Ndërkohë sot në Komisionin e Ligjeve, nënkryetari i KLP-së, Alfred Balla, tha se ky institucion prej tre vitesh kryen rivlerësimin e magjistratëve të rinj që hyjnë në sistem.
“Besoj se KLP i ka kapacitet, do të ishte absurde të thuash që nuk i ka. Ne me ligj, edhe aktualisht, kemi 3 vjet që bëjmë vetingun për magjistratët e rinj. Pra, ne kalojmë në veting 20-25 magjistrat të rijn që hyjnë në sistem dhe kur mbarojnë shkollën ia bëjmë prapë”, tha Alfred Balla.
Por deputeti demokrat Enkelejd Alibeaj u shpreh kritik, kur tha se KLP nuk kishte përllogaritur fondet vjetore për vetingun e prokurorëve në rast se mandati i Komisionit të Pavarur të Kualifikimit nuk zgjatet.
“Juve u shprehët si të vendosë qeveria. Do t’ia lër KLGJ-së apo KLP-së, si të vendos Parlamenti. Ku e dini ju që do të ndryshojë Kushtetuta? Edhe ndodhin edhe s’ndodhin. Ju keni një fakt të sigurt, vetingun. Po sikur në 17 qershor të jeni ju që do të bëni vetingun, ju kërkesë nuk keni bërë për fonde, as për staf shtesë nuk keni bërë”, u shpreh Alibeaj.
Në përgjigje të deputetit Alibeaj, Balla tha se fondet aty janë dhe ato do të ndahen midis KLGJ-së dhe KLP-së. “Të paktën për mua si jurist është e thjeshtë”, tha Alfred Balla.
“Ti po thua këtë gjë, mirë me vjehrrën, mirë me nusen. Po desh qeveria të na japë paratë, ne s’kemi bërë kërkesën. Po thoni në mënyrë tjetër që s’keni marrë masat për t´a zbatuar”, tha Alibeaj.
Replikat
Alibeaj: Ju skeni bërë kërkesë për buxhet shtesë pasi më 17 qershor i bie të merrni procesin e Vettingut të prokurorëve sepse sipas Kushtetutës i mbaron mandati KPK.
Balla i KLP: Unë thashë që në faqen zyrtare të Kuvendit është publikuar një nismë ligjore për ndryshimin e Kushtetutës dhe ne presim vendimin e Parlamentit pa asnjë lloj paragjykimi.
Bushka: Buxhetohet funksioni dhe jo institucioni.
Balla i KLP: Për Vetingun ka buxhet të planifikuar dhe paratë pastaj do ndahen mes KLGJ-së dhe KLP. Ekzekutivi do të bëjë rialokimin e fondeve. Ne jemi në gjendje që për 8 muaj të llogarisim nevojat buxhetore dhe t’i kërkojmë.
Alibeaj: Ti po thua, mirë me vjehrrën dhe mirë me nusen. Homologu juaj KLGJ ka bërë kërkesë si çdo institucion tjetër. Ata kanë parë që në vitin 2022 ju ndodh një ngjarje, kanë marrë masat. I kanë çuar kërkesë qeverisë. KLP, institucioni simetrik në funskione, nuk jeni simetrik edhe në reagim. Ju thoni po desh Qeveria edhe na jep para, ne s’kemi bërë kërkesë. Një institucion i pavarur si KLP është treguar minimalisht indiferent.
Bushka: Ju tërheq vëmendjen, mos i intimidoni institucionet e pavarura.
Alibeaj: Nuk është intimidim, nëse e ndjeni të tillë intimidohuni, pak rëndësi ka! Ju e keni marrë me mendjelehtësi këtë punë. Një ngjarje që është më e rëndësishmja për sistemin e drejtësisë në këtë vit.
Bushka: Do ta mbyllim këtë dëgjesë. Gjithçka bëhet këtu për politikë. Po të jeni të shqetësuar ju vërtetë duhet të flisnit këtu për studentët që pse nuk po dalin për të mbyllur vakancat.
Alibeaj: Nëse ju doni ta mbushni shkollën me militantë të fondacionit “Qemal Stafa”.
Bushka: Në vitin 2019 nuk e miratuat nismën dhe ja ku jemi sot. 5 minuta pushim.
Alibeaj: Në vitin 2019 nuk kam qenë në Parlament znj. kryetare, kam qenë në shtëpi.
