Drejtuesi i një autobusi u arrestua për veprën penale “Ndihma për kalim të paligjshëm të kufijve”, në aksin Gramsh-Cërrik.
Në automjetin që ai drejtonte, u gjetën nga policia 9 refugjatë.
“Specialistët për Hetimin e Narkotikëve dhe Trafiqeve të Paligjshme në DVP Elbasan, në bashkëpunim me shërbimet e Komisariatit të Policisë Gramsh, bazuar dhe në informacionet e marra në rrugë operative se me një autobus po transportoheshin 9 emigrantë të paligjshëm nga vendet e treta, kanë organizuar punën duke ngritur pika kontrolli në aksin rrugor Gramsh-Cërrik. Si rezultat i kontrollit, në aksin rrugor Gramsh-Cërrik, në fshatin Ceruje, shërbimet e Policisë kanë ndaluar mjetin autobus që drejtohej nga shtetas F. L. Nga kontrolli rezultoi se ky shtetas po transportonte me autobus, në drejtim të Tiranës, 9 shtetas nga Siria, kundrejt fitimit”, njoftoi policia.
Në përfundim të veprimeve u bë arrestimi në flagrancë i shtetasit F.L., 57 vjeç, banues në Tiranë, ndërsa në cilësinë e provës materiale u sekuestruan automjeti dhe 1 aparat celular, shtuan të njëjtat burime.
