Richard Grenell konsiderohet si ‘ministri hije’ i Donald Trump për postin e kreut të Departamentit të Shtetit. Por deklarata e sotme e ish-presidentit Trump, që pret të rikandidojë në vitin 2024, ka bërë jehonë.
Trump ka pranuar se Grenell është i dërguari i tij në Rajon.
Trump reagoi pasi Grenell vizitoi kufirin mes Kosovës dhe Serbisë, duke vlerësuar një marrëveshje të arritur me ndihmën e administratës së Trump.
Revista Forbes e quan këtë ‘diplomaci hije’ të Donald Trump. Të tjera media shkojnë më larg kur flasin për qeveri hije.
Trump publikoi një deklaratë për shtyp të enjten duke thënë se ‘i dërguari i tij’ ambasadori Richard Grenell ka vizituar kufirin mes Kosovës dhe Serbisë për të shprehur frustrimin se marrëveshja historike për normalizimin nuk është implementuar.
NewsMax shkruan se Presidenti aktual amerikan, Joe Biden e ka injoruar këtë marrëveshje.
Ndërkohë tensionet mes Kosovës dhe Serbisë u shtuan ndjeshëm gjatë javëve të fundit, kur Beogradi stacionoi trupat në kufi me shtetin e ri.
Grenell ka qenë i dërguar special për dialogun mes Kosovës dhe Serbisë. Po ashtu ai ka drejtuar agjencinë e inteligjencës kombëtare amerikane.
Deklarata e Trump
Popujt e jashtëzakonshëm të Kosovës dhe Serbisë kanë kapërcyer pengesa të mëdha në rrugën e normalizimit ekonomik. Marrëveshjet e ndërmjetësuara nga administrata ime janë historike dhe nuk duhet të braktisen, shumë jetë janë në rrezik. Rajoni është shumë i rëndësishëm dhe njerëzit kanë pritur shumë gjatë që kjo punë të arrihej.
Sot, i dërguari im, ambasadori Richard Grenell vizitoi kufirin Kosovë-Serbi për të nënvizuar këtë marrëveshje të rëndësishme. Ashtu siç dëshmuam në Lindjen e Mesme me Marrëveshjet e Abrahamit, paqja dhe normalizimi ekonomik është i mundur, por kërkon një përpjekje të sinqertë dhe udhëheqje të palëkundur. Paqja është e mundur, mos u dorëzoni – prosperiteti afatgjatë për këto dy kombe është në rrezik.
