Nga Boldnews.al
Nuk ka më asnjë dyshim. Edhe më dashamirësi i Rilindjes e kuptoi se ish-kryepolicin Ardi Veliu nuk e lidhte asgjë me uniformën e shtetit, ai ishte nën petkun e kostumit të pushtetit.
Me gradën e madhe mbi supe, që ia dhuruan në kundërshtim të hapur me ligjin, Ardi Veliu e tregoi veten së fundmi që do jetë “velinë” e kryeministrit, duke pranuar me shumë zell postin e zëvendëministrit të Infrastrukturës dhe Energjitikës, që drejtohet nga Belinda Balluku. Në historinë post komuniste të shtetit tonë, është hera e parë që një ish-drejtues policie të bëhet zëvendëministër.
Nuk dihet edhe në formimin profesional të karrierës policore se çfarë e lidh Veliun me Infrastrukturën dhe Energjitikën, por ashtu sikurse nuk e lidhte asgjë me të qenit kryepolic, edhe këtë herë nuk ka zhgënjyer në pritshmëri. Me vendim të drejtëpërdrejtë të kryeministrit Edi Rama, ish-kreu më kontrovers i policisë së shtetit, tashmë do e ketë zyrën ngjitur me Belinda Ballukun. “Blerja” më e re e ministrisë u “hodh në ankand” dhe në fund kapelja e Ardi Veliut përfundoi nga duart e Ramës tek Balluku.
Sa pak shiti atë uniformë për të cilën kanë dhënë jetën në 30 vitet e fundit 225 dëshmorë. Ajo uniformë e larë me gjak u “përdhos” nga persona që e konsideruan veten elitë e strukturave të Policisë së Shtetit.
Veliu hoqi dorë nga çdo pozicion në polici, duke konfirmuar mjerimin mental si shoqëri, ku drejtuesi i Policisë së Shtetit bëhet një me pushtetin. Me shumë interes do të jetë edhe ulja pranë Ramës në mbledhjet e ardhëshme të kabinetit qeveritar. Në kohën kur shefja e tij e tij Belinda Balluku mund të udhëtojë drejt Dubait, në pritje të biftekut të artë të Nusre-it, Veliu do e zëvendësojë.
Kjo do jetë kënaqësia më e madhe për të, edhe një herë pranë idhullit Rama, i cili “servilët e tij” nuk i lëshon kurrë, edhe nëse i largon nga një post kur e bëjnë baltë, u ofron një tjetër. Rangu i zëvendëministrave për nga hierarkia konsiderohen si “qoka të kryeministrit” që emëron dhe largon sipas shijes së tij.
Në letrën e detyruar të dorëheqjes, të shkruar me shumë gabime, ortografike dhe logjike, Veliu shprehej se po jepte dorëheqjen për ti qëndruar më pranë familjes, për arsye kohe. Por tashmë kjo detyrë e rëndësishme e do që Veliu të hipë në kamionë borëpastruese, të bëjë selfie me ministren Balluku dhe të udhëtojë kudo që shtrohet një metër rrugë, pasi kështu e do propaganda.
Njeriu që do të mbahet mend si mbyti qytetarët me gaz lotsjellës, sesi manipuloi provat në vendin e ngjarjes në Elbasan, sesi brenda pak muajsh iu vranë dy efektivë policie në Lezhë dhe nuk tutej, sesi në masakrën e verës në Velipojë me katër të vrarë bënte “sfilatë” para kamerave, në një ditë nëntori e sheh veten zëvendëministër i Infrastrukturës dhe Energjitikës.
Kohë më parë i pelqente ta quanin me pseudonimin “kambalja”, duke u nisur nga formimi i tij ushtarak, por me emërimin si zëvendësi i Ballukut, pseudonimi do i ndryshojë, ndoshta në “taka 12 pont”…