Sekretari i Partisë Demokratike, Gazment Bardhi deklaroi këtë të Enjte nga selia blu se në zyrën e PD nuk ka ardhur asnjë kërkesë për mbledhjen e Kuvendit Kombëtar të partisë.
Më herët, jashtë selisë së PD-së, Flamur Noka, Gent Strazimiri dhe Arben Ristani u shprehën se firmat e mbledhura për thirrjen e Kuvendit Kombëtar të PD-së lidhur me vendimin e Bashës që përjashtoi Berishën nga grupi parlamentar demokrat, verifikohen në nisje të vetë Kuvendit.
Pas kësaj deklarate, Gazment Bardhi, në një konferencë për gazetarët, u shpreh se procedura është ndryshe. Sipas tij, duhet që firmat të depozitohen në zyrën e protokollit të PD në mënyrë që të mblidhet dhe Kuvendi Kombëtar i partisë.
“Tallja me PD vijon. PD është institucion. S’jemi organizatë që vepron në ilegalitet. Në funksiononim tonë të brendshëm kemi detyrimin në raport me demokratët për të zbatuar rregullat e brendshme të PD, statusin e PD. Në PD nuk ka ardhur deri në këtë moment asnjë kërkesë qoftë dhe të një anteri të vetëm të PD për mbledhjen e Kuvendit Kombëtar”, tha Bardhi.
“Nuk u arrit që pas dy muajsh kontakti me demokratët të siguroheshin ¼ e firmave të anëtarëve të Kuvendit Kombëtar apo anëtarëve të partisë që të mundësohej nisja e procedurës për thirrjen e Kuvendit. Në momentin kur skadon afati, bëhet një tallje me demokratët. Nëse i kanë firmat ripërsëris thirrjen time ti depozitojnë në protokollin e PD-së. Çdo institucion i partisë ka përgjegjësinë për të respektuar vullnetin e demokratëve. Në zyrën e protokollit ka punonjës Partia Demokratike”, shtoi ai.
“Dje mora masa që punonjësit e administratës të qëndrojnë në punë pas orarit zyrtar duke qenë se në media njoftua se do dorëzoheshin në orën 17:00. Nuk sillen firmat nga dera pas, në një zyrë që nuk është e kryetarit të Këshillit Kombëtar se është një funksion honorifik. Zyrën Paloka e ka si ish-nënkryetar, por në mirëkuptim nuk e ka dorëzuar ende. Dhe tani na thonë të shkojmë të hyjmë te kasaforta e zotit Paloka për të parë janë apo jo firmat. Sot na thanë vetëverifikohen, pra x verifikon firmën e x. Pra secili që ka firmosur verifikon firmën e vet. Me kë tallen këta?! Kjo parti është institucion dhe duhet të respektohet si institucion. Aq më tepër kur bëhet fjala për ish-drejtues të lartë të PD. Por blofin me demokratët s’ja ka borxh askush. Nëse nuk verifikohen firmat kush e thërret Kuvendin, kasaforta”, tha Bardhi.
“Unë jam rritur me foton e Sali Berishës në shtëpi, por kur ngatërrohet interesi i demokratëve me interesin e tij ngushtësisht personal, unë padyshim do mbroj interesin e demokratëve”, u shpreh më tej Sekretari i Përgjithshëm i Partisë Demokratike.
LEXO EDHE: