Biznesmeni Ruzhdi Hoxha, i cili u gjet i pajetë rreth dy javë pasi familja e tij kishte humbur kontaktet, është ekzekutuar me dy plumba.
Trupi i pajetë i biznesmenit të inerteve, u gjet pas Malit të Dajtit, ndërsa policia arrestoi Fredi Rrushin si autorin e dyshuar të krimit.
I arrestuari mësohet se ishte një nga miqtë e viktimës.
Nga raportimet mësohet se Hoxha është qëlluar me dy plumba, një në gjoks dhe tjetri në qafë, ndërsa në trupin e tij janë evidentuar shenja dhune, por nuk dihet nëse ato janë shkaktuar nga hedhja e trupit në greminë, atje ku edhe u gjet.
Rrethanat e vrasjes se tij janë ende te paqarta, ndërsa autori pritet të përballet me Gjykatën ku do t´i caktohet edhe masa e sigurisë.
Trupi i pajetë i biznesmenit Hoxha u gjet i mbuluar me disa gurë. Fakti se trupi kishte nisur të dekompozohej i ka bërë hetuesit të dyshojnë se ai është ekzekutuar ditën që u raportua si i zhdukur, pra rreth 17 ditë më parë.
Nga raportimet mësohet se policia shoqëroi fillimisht Fredi Rrushin, i cili sipas disa dëshmive të mbledhura ishte personi i fundit që ishte takuar me viktimën. Mësohet se Rrushi para uniformave të policisë deklaroi se biznesmenin e kishte takuar mbrëmjen e datës 22 Tetor. Ky fakt konfirmohet edhe nga dëshmia e E.T, një shok tjetër me të cilin viktima ishte takuar para se të kontaktonte Ruzhdi Hoxhën.
“Rreth orës 23: 00 aty ka ardhur një automjet tip Passat , targat nuk i mbaj mend, ngjyrë gri e errët, në të cilin ishin 3 persona, të cilët nuk i njoh, emrat e të cilëve i kam mësuar kur së bashku me familjarët e Ruzhdiut po interesoheshin se ku ishte. Shtetasit në makinë ishin K.I , A.S dhe Fredi Rrushi. Pasi ka ardhur kjo makina me këto persona, Ruzhdiu hipi me ta në vend të parë, duke me thënë të shkoja në shtëpi se ai po dilte me shokët e tij” ka thënë në polici E.T, mik i familjes së Ruzhdi Hoxhës.
I akuzuari për vrasjen, Fredi Rrushi, ka pohuar para policisë se pasi kishin pirë disa birra bashkë me Ruzhdi Hoxhën, e kishte lënë biznesmenin e zhdukur në zonën e njohur si “Treshi” në Tiranë. Pas kësaj nuk kishte pasur asnjë kontakt me të.
Një detaj shtesë ia kishte pohuar djalit të viktimës, Saimirit, i cili interesohej në telefon për fatin e të atit.
“Unë kam marrë në telefon Fredi Rrushin dhe i kërkova takim për të pyetur se ku është babi, pasi Fredi ishte personi i fundit që e kishte takuar. Fredi më ka thënë se nuk jam në shtëpi por kam ikur tek puna në Martanesh, dhe më ka thënë në telefon se babin tënd e kam lënë në mesnatë te treshi, dhe do të vinte ta merrte një gocë, një shoqe e tij, kaq më ka thënë” janë fjalët e Saimir Hoxhës, djalit të viktimës i cili u ka përcjellë policëve atë që i kishte treguar njeriu i fundit që takoi babai i tij.
Menjëherë pas kësaj, policia kontrolloi filmimet e kamerave të sigurisë në disa zona të Tiranës, në orët kur pretendohet se ka lëvizur mjeti “Passat”, ku udhëtonin viktima dhe i dyshuari për vrasjen.
Policëve u ka rezultuar se natën e krimit, makina ka lëvizur në zonën e Dajtit. Kjo ka bërë që kërkimet të përqëndrohen në këtë zonë. Të premten aty u gjet një xhup i gjakosur, për të cilin familjarët e Ruzhdi Hoxhës thanë se i përkiste vetë atij.
Nga kontrolli me qentë gjurmës u gjet edhe trupi i pajetë, në një greminë, i mbuluar me zhavorr dhe gurë. Fredi Rrushi është arrestuar që në ditën e parë kur është marrë në pyetje. Nga verifikimet rezultoi se ishte në kërkim nga Italia për trafik droge.
