Ish-Kryeministri Sali Berisha u shpreh sot gjatë një takimi me të rinjtë demokratë se Kuvendi i 11 dhjetorit do e kthejë Partinë Demokratike në shtëpinë e lirisë dhe demokracisë.
Berisha tha se duke qenë se Lulzim Basha është zgjedhur përmes parimit “1 anëtar, 1 votë” shkarkimi ose rikonfirmimi i tij në këtë detyrë, duhet të bëhet, sipas mendimit tim, po përmes këtij parimi.
“Kuvendi i PD do të garantojë rregullat e lojës, duhet të miratojë ndryshimet statutore që do të garantojnë funksionimin e institucioneve të kësaj partie, që Kryetari i saj të mos uzurpojë institucionet.
Kuvendi ka tagrin të shkarkojë edhe Kryetarin, por duke qenë se Lulzim Basha është zgjedhur nga anëtarësia, atëherë mendoj se do të jeni ju, që do të përcaktoni se kush do të jetë Kryetari i Partisë Demokratike”, tha Berisha.
“Kuvendi, qëllimin më madhor ka rivendosjen, rikthimin e PD nëpërmjet normave të qarta në Shtëpinë e Lirisë. Kuvendi do të sanksionojë nene, kur kryetari nuk do të guxojë të shkelë normat statutore, pasi të jetë automatikisht i shkarkuar.
Kuvendi i ka të gjitha fuqitë të shkarkimit të kryetarit dhe fuqi tjetër. Unë mendoj se Kuvendi përgjigjen e parë do të japë, ndryshimet e thella statutore. Shkarkimi i Lulzim Bashës përveç se nga Kuvendi, duhet të bëhet me votën tuaj në të gjithë Shqipërinë.
Unë nuk do të kundërshtoj kurrë verdiktin, kur vota juaj do të jetë e lirë’, tha lideri historik i PD-së Sali Berisha.
