Prokuroria e Posaçme ka përfunduar hetimet ndaj dy të rinjve Xhulian Hoxha dhe Euglen Halili në lidhje me dy vrasje të ndodhura vitin e kaluar në qytetin e Elbasanit dhe ka dërguar dosjen e tyre për gjykim. Ndaj të rinjve rëndojnë akuza si vrasje me paramendim, armëmbajtje pa leje, si dhe pjesëmarrje në grup të strukturuar kriminal. Bëhet fjalë për vrasjen e Emiljano Ramazanit me 20 Korrik dhe Regis Runajt me 29 Korrik.
“Xhulian Hoxha akuzohet për krimin e vrasjes së Emiljano Ramazanit më datë 20 Korrik 2020 në lagjen “28 Nëntori”, Elbasan, Ndaj tij rëndojnë akuzat: “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”.
Po ashtu akuzohet për krimin e vrasjes së Rigels Runaj më datë 29 Korrik 2020 në lagjen “Emin Matraxhiu”, në afërsi të varrezave të qytetit Elbasan. Lidhur me këtë ngjarje akuzohet pëe veprat pebale: “Vrasja me paramendim”, dhe në të dy krimet duke bashkëvepruar dhe me të tjerë persona nën hetim në formën e veçantë të bashkëpunimit “Grup i strukturuar kriminal” dhe “Pjesëmarrje në grup të strukturuar kriminal”.
Euglen Halili, për krimin e vrasjes së Emiljano Ramazanit akuzohet për veprën penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”. Për vrasjen e Rigels Runajt akuzohet për veprat penale “Vrasja me paramendim”, dhe në të dy krimet duke bashkëvepruar dhe me të tjerë persona nën hetim në formën e veçantë të bashkëpunimit “Grup i strukturuar kriminal” dhe “Pjesëmarrje në grup të strukturuar kriminal”.
SPAK njofton se po vazhdojnë hetimet ndaj personave të tjerë të përfshirë si autorë të mundshëm në këto dy ngjarje kriminale.
Xhuliano Hoxha bashkë me Euglen Halilin dyshohet se anë vrasës me pagesë.
Sipas grupit hetimor, ata kanë qenë në shoqërinë e Regis Runajt mbrëmjen e 29 Korrikut kur edhe u vra i riu. Pasi konsumuan lëndë narkotike pranë varrezave, ata iu drejtuan qytetit të Elbasanit. Në afërsi të varrezave, Halili goditi 1 herë me thikë pas shpine Runajn dhe më pas e goditi edhe 26 herë të tjera duke i shkaktuar vdekjen. Gjatë hetimeve, dy të rinjve iu gjet një motor me njollat e gjakut të viktimës dhe një shumë eurosh.
Dy të rinjtë rezultuan të përfshirë edhe në vrasjen e Emiljano Ramazanit më 20 Korrik, mikut të Regis Runajt. Ata dyshohet se kanë kontrolluar lëvizjet e viktimës. Për të dyja këto punë, të rinjtë dyshohet se u paguan nga persona të tjerë.
