Prokuoria e Përgjithshme ka përfunduar gjetjet për ish-deputetin Tom Doshi, në kuadër të verifikimit të ligjit të dekriminalizimit.
Megjithëse Doshi nuk ka marrë mandatin e deputetit në zgjedhjet e 25 prillit, Prokuroria e Përgjithshme ka përcjellë informacionet e përmbledhura në disa faqe, drejt Komisionit Qendror të Zgjedhjeve.
Bazuar në të dhënat e mbledhura nga Prokuroria e Përgjithshme, rezulton se ish-deputeti Doshi ka qenë dënuar në 1990 për plagosje të rëndë me dashje dhe sjellje të padenjë në shoqëri.
Gjithashtu, Doshi është hetuar nga Prokuroria e Përgjithshme për organizim dhe pjesëmarrje në grumbullime të paligjshme.
Sipas Prokurorisë së Përgjithshme, ish-deputeti është hetuar për goditje për shkak të detyrës dhe dëmtime të tjera me dashje.
Gjithashtu ai është hetuar lidhur me kallëzim të rremë, deklarim i rremë para prokurorit, kanosje për deklarime a dëshmi apo përkthim të rremë.
Një tjetër çështje për të cilën ish-deputeti është hetuar ka qenë ajo e refuzimit për deklarim apo deklarim i rremë i pasurisë.
Gjetjet nga Prokuroria:
Tom Doshi nga verifikimet e Prokurorisë së Përgjithshme rezulton i hetuar apo i akuzuar për veprat penale:
– Plagosje të rëndë me dashje, kryer në bashkëpunim dhe “sjellje e padenjë në shoqëri” më 26.02.1990.
– Organizim dhe pjesëmarrje në grumbullime, manifestime të paligjshme” më 20.01.2012.
– Goditje për shkak të detyrës, më 13.03.2008.
-Kallëzim i rremë, deklarim i rremë para prokurorit dhe kanosje për deklarime a dëshmi, ekspertim ose përkthim të rremë, më 20.03.2015 nga Prokuroria e Përgjithshme.
– Refuzim për deklarimin, mos deklarim, fshehje ose deklarim i rremë i pasurive dhe interesave private të personave të zgjedhur dhe nën punësve publik.
Rezulton të ketë qenë i ndaluar për “kallëzim të rremë” nga data 26.03.2015 deri më 28.03.2015 pasi gjykatat u ka caktuar masën “arrest shtëpie”
Rezulton të ketë qenë i arrestuar në burg në Durrës si i dyshuar për veprën penale “plagosje e rëndë me dashje më 26.02.1990.
Rezulton të ketë qenë me masë sigurie personale:
“Arrest në shtëpi” më 28.03.2015 për “Kallëzim të rremë” “Kanosje për deklarime të rreme.
– “Detyrim për tu paraqitur në policinë gjyqësore”, 28.04.2015 “Kallëzim i rremë”
-Rezulton të jetë “Non Grata” në SHBA.
