Deputetët e Partisë Demokratike dhe ato të PS-së, anëtarë të Këshillit të Legjislacionit dhe Komisionit të Ligjeve nuk arritën sot të dakordësohen për shqyrtimin në të njëjtën kohë të propozimeve lidhur me ndryshimet Kushtetuese. Kjo ka bërë që demokratët të largohen nga mbledhja e Komisioneve, pasi socialistët nuk kanë pranuar që propozimi i tyre për zgjatjen e afateve të Organeve të Vetting, të diskutohet njëherazi me propozimet e PD për ndryshimet Kushtetuese.
Sekretari i Përgjithshëm i PD, Gazment Bardhi, u shpreh se Vettingu nuk është çështje teknike, por një çështje thelbësore. Reagimi i Bardhi erdhi pasi nga deputetë të PS, zgjatja e afateve të Organeve të Vetting po trajtohej si një çështje e thjeshtë, ndërsa paketa e propozimeve të opozitës, si një çështje që kërkonte kohë për tu diskutuar.
“Po hidhni në erë dialogun politik”, iu drejtua Bardhi, Kryetares së Kuvendit, Lindita Nikolla.
Deputeti demokrat u shpreh se mbledhja po vijon të shtyhet duke mos i dhënë zgjidhje asnjë kërkese, pavarësisht ofrimit të bashkëpunimit nga PD.
Ndërkohë, Nikolla propozoi që mbledhja të vijojë të ditën e premte.
Debatet
Alibeaj: Nuk ka pse të presim mbledhjen tjetër, bëjmë thirrje të mos demaskojmë pozicionet politike që tani. Të spostohet orari në 17:00 dhe të mos vazhdojmë të shtyjmë mbledhjet.
Gogu: Është e disata e herë që përmes dialogut të gjëjmë gjuhë të përbashkët, por paragjykohemi. Ka një propozim konrekt, na jepni kohë të njihemi me kalendarin. Duam ta shikojmë dhe duam të vijmë edhe me propozime.
Rushaj: Kemi edhe Komisione të tjera, por ky është prioritar
Bardhi: Po merremi me të njëjtën çështje, ne kemi të drejtën tonë të propozojmë kalendar dhe seanca dëgjimore dhe e kemi bërë. Ju lutem na jepni mundësinë ti miratojmë këto seanca dëgjimore. Ju nuk mund të na thoni që tek iniciativa jonë do vini kur të duam ne dhe te iniciativa juaj do të vini po kur të thoni. Ne kemi propozuar një kalendar dhe po zgjatemi kot.
