Të tjera detaje raportohen lidhur me ekzekutimin e Xhelal Reçit, 61 vjeç, ngjarje e ndodhur mëngjesin e djeshëm në Laç.
Nga të dhënat e fundit mësohet se policia ka shoqëruar të paktën 25 persona, një pjesë e të cilëve familjarë të viktimës, që janë pyetur lidhur me konfliktet e mundshme.
Ndërkohë që një pjesë e të shoqëruarve raportohet se kanë qenë pranë vendit të ngjarjes, ndërsa të tjerë të shoqëruar njihen si persona me precedent penalë dhe janë marrë në pyetje.
Nga raportimet mësohet se gjithashtu pamjet nga kamerat e sigurisë të sekuestruara një ditë më parë po analizohen, megjithëse autorët kanë qenë të maskuar.
Pista kryesore ku po heton policia është ajo e konflikteve të mundshme të djalit të viktimës, Besnik Reçit, ndaj të cilit 1 vit më parë u qëllua me armv zjarri, teksa ai udhëtonte me makinë bashkë me familjen e tij.
Atentati ndaj Besnik Reçit ndodhi në aksin Lezhë-Shkodër. Sipas raportimeve, policia po heton lidhur me konfliktet e mundshme, pasi edhe atentati ndaj Besnikut, ku fatmirësisht nuk pati të lënduar, mbeti pa autorë.
Gjithashtu policia po kryen ekspertizën e mjetit që u gjet i djegur pas ekzekutimit të 61-vjeçarit Reçi, me shpresën se mund të gjejë gjurmë të autorëve.
Reçi, një ish-punonjës policie, u qëllua me armë zjarri shumë pranë biznesit të tij, ndërsa në atentatin ndaj 61-vjeçarit kanë qenë dy persona, por vetëm njvri ka qëlluar.
