Ministrja e Financave dhe Ekonomisë, Delina Ibrahimaj deklaroi sot se lista me 7 koncesionet që janë në projektbuxhetin e vitit 2022 është potenciale dhe vendoset në projektbuxhet me qëllim disiplinimin e praktikave buxhetore.
Gjatë prezantimit të projektbuxhetit 2022 në Komisionin Parlamentar të Ekonomisë dhe Financave, Ibrahimaj tha se kjo listë ka qenë edhe në buxhetin e vitit 2021, por nuk janë materializuar.
Sipas saj, ende nuk ka një njoftim nga institucionet përkatëse që do të fillojë procedura.
“Lista e koncesioneve në fakt janë lista potencialisht koncesione që mund të fillojnë gjatë vitit në vijim. Ne për qëllime transparence dhe disiplinimit të praktikave buxhetore i publikojmë dhe i bëjmë pjesë të projektbuxhetit”, deklaroi ministrja.
Sipas saj, kjo listë ka qenë e njëjtë edhe në 2021 dhe jo domosdoshmërish lista e koncesioneve që është e paraqitur do të fillojë, por është listë potenciale
“Janë 7 koncesione të vendosura në p/buxhet por ne ende nuk kemi marrë një njoftim zyrtar nga institucionet që do të fillojnë. Publikohet me qëllim disiplinimin. Nuk kanë efekte buxhetore dhe nuk është parashikuar mbështetje buxhetore. Mund të mos fillojnë dhe i tillë është rasti i kolaudimit të mjeteve, shërbim ky që ka filluar të jepet nga Drejtoria e Shërbimit të Transportit Rrugor”, tha Ibrahimaj.
Në projektbuxhetin e vitit 2022 janë 7 koncesione të planifikuara, konkretisht, ndërtimi dhe operimi i aeroportit të Sarandës, ndërtimi operimi dhe mirëmbajtja e portit te integruar “Triport Vlorë“, ndërtimi i segmentit rrugor Milot-Fier në Autostradën Adriatiko Joniane, dhënia me koncesion/PPP e infrastrukturës së bazës së të dhënave dhe mbikëqyrjes së qendrave të kontrollit teknik të mjeteve rrugore, ofrimi i shërbimit të infrastrukturës së çelësave publik PKI, përmirësimi i infrastrukturës rrugore dhe rekreative të blloqeve të banimit në disa lagje të qytetit Elbasan dhe rritja e sigurisë rrugore.
