Gent Strazimiri, anëtar i Kryesisë së PD, ka ironizuar kreun demokrat, Lulzim Basha, lidhur me deklarimet e tij se ka mbështetjen e 95 % të demokratëve.
Strazimiri shprehet se deklarata të tilla nuk i beson askush, madje as vetë Basha, kur i thotë.
“Shpresoj të jetë një lapsus apo tentativë për të bërë shaka dhe pse nuk është momenti për të provokuar demokratët me shprehje të tilla. Ata që janë masivisht në foltore ti quash 3% dhe 98% ky e paska me vete është të provokosh demokratët, as Sali Berishën dhe as Foltoren. Të barazosh Foltoren me Edi Ramën apo trekëndëshin e Bermudës, të quash demokratët llum i tranzicionit, drejtorë të korruptuar është një aventurë që nuk do ja këshilloja as armikut jo Lulzim Bashës. Ai barazoi Berishën me Ramën”, tha Strazimiri.
Në një intervistë për Tv Ora, Strazimiri theksoi se ka një tendencë për të dekurajuar demokratët të marrin pjesë në foltore por nuk do ta quaja dramatike, është një aventurë krejtësisht e panevojshme, një aventurë e kotë dhe e dëshpëruar e cilitdo që mendon se mund të ndalë foltoren.
“Foltoret janë të pandalshme. Kërkesa e demokratëve në të gjithë trevat e Shqipërisë është e jashtëzakonshme që Berisha të shkojë dhe të bisedojë me ta. Foltorja do jetë kudo ku rreh një zemër shqiptari dhe demokrati”, tha ai.
Strazimiri nuk përjashtoi mbajtjen e zgjedhjeve në 11 dhjetor.
“Do ta vendosë Kongresi, mund të vendosë gjithçka dhe pse nuk është në rend dite”, shtoi ai.
Ndërkohë ai përjashtoi kategorikisht një përplasje të demokratëve në selinë blu me Gardën që mbron Bashën.
“Në mënyrë më absolute nuk do ketë një ngjarje të tillë. Demokratët do mblidhen aty ku është vendi për tu mbledhur Kongresi”, shtoi ai.
