“Lulzim Basha e pati mundësinë të bëhej lider, por nuk u bë. Çfarë bëri? Pushkatoi politikisht figurat e Partisë Demokratike. Ishte lider i thyer”, tha ish-Kryeministri Sali Berisha në Foltoren e organizuar në Korçë.
Berisha u shpreh se i kishte kërkuar dorëheqjen Bashës në 2017, ndërsa shprehu ndjesën për mbështetjen që i ka dhënë Lulzim Bashës për 8 vite.
Ish-Kryeministri deklaroi se PD duhet të kthehet te vlerat dhe parimet, duhet të bëhet një parti konservatore, ku kryetari pasi humbet zgjedhjet ikën.
“Do të bëjmë ndryshimet në statut, ku kryetari nuk do të thotë që të jetë edhe Kryeministër. Do vendosim primaret në këtë parti,jo me votë negative.
Do të kthejmë peshën e votës së anëtarëve të PD-së, të cilët duhet të votojnë për kandidatët që duan, qoftë për deputet, qoftë për kryebashkiakë, qoftë për këshilltarë bashkiak”, tha Berisha.
