Nga takimi në Ankara i Ballukut e Ramës te ndërhyrja e “oligarkut”/ Dritëhijet e tenderit të tunelit të Llogarasë

Fituesi i tenderit për tunelit të Llogarasë ishte një nga çështjet e shumëdebatura këtë të Enjte në Kuvend, ku u hodhën akuza për një procedurë të paracaktuar.

Ishte fillimisht kryetari i Partisë Demokratike i cili shtroi pyetjen drejtuar kryeministrit Edi Rama: Tunelin e Llogarasë pse e ke 12 milionë euro më shtrenjtë se oferta më e ulët?

Më tej, Basha ngriti dyshimet për lobimin e biznesmenit Samir Mane në këtë tender. “Zymiri të mori për tunelin e Llogarasë”, pyeti kreu i opozitës kryeministrin Rama, nga foltorja e Kuvendit.

Çështjen e preku dhe deputeti demokrat Bujar Leskaj i cili paralajmëroi auditim të procedurës.

Për temën foli dhe ligjvënësi Arbi Agalliu, i cili zbuloi se CEO e kompanisë fituese të tenderit ka zhvilluar një takim me kryeministrin Edi Rama dhe ministren e Infrastrukturës Belinda Balluku, katër muaj para shpalljes së procedurës.

“Unë kam një pyetje para se të filloj diskutimin. Te faqja zyrtare në Linkedin e pronarit, CEO-s së kompanisë që fitoi tenderin e Llogarasë para katër muajsh nga data e shpalljes së tenderit, kemi një foto të tij me kryeministrin dhe ministren që patjetër mund të ketë qenë takim pune. Pyetja është: A keni shkuar ne zyrat e kompanive të tjera që kanë aplikuar në tender për ti takuar sikurse këtë? Biznesmen i nderuar ndoshta është, por ndryshe nga etika e biznesit ka në foto profili Presidentin turk”, tha ai.

LEXO EDHE  Berisha: Kriza energjitike e shpikur nga Rama për të mbuluar korrupsionin, ja si i vodhën paratë tuaja

Ministrja Balluku pranoi takimin e zhvilluar, ndërsa u shpreh: “Është një vizite zyrtare ne Ankara dhe s’mbaj liste me kë bëj foto dhe kë takoj kur bëj takime biznesi”.

Për tenderin, ministrja po ashtu u shpreh: “Në rast se një ofertë vjen e ulët, por nuk ka asnjë copë letër, duhet ta japim sipas jush? Unë besoj se jo megjithatë ka komisione vlerësimi të cilat vlerësojnë ka një ligj të prokurimeve që është votuar në mars 2021 në këtë parlament, që vlerësimi është me pikë dhe vlerësohet pjesa e parë që ka të bëjë me eksperiencat e mëparshme dhe padyshim që një kompani që mund ta marrë në një lot të Unazës nuk e merr te tjetra, sepse një lot mund të jetë një rrugë fushore, tjetra të jetë viadukt ose urë dhe nëse ti nuk ke ndërtuar viadukte apo ura nuk ke sesi e merr, sepse nuk plotëson pikët te pjesa e eksperiencës. Megjithatë kjo nuk është diçka që duhet konsumuar këtu, mjafton ti referoheni ligjit”.