Seanca e sotme parlamentare nisi me debate për kohën e fjalimeve në Kuvend.
Deputeti i Partisë Demokratike, Gazment Bardhi kundërshtoi vendimin e Konferencës së Kryetarëve për uljen e minutazhit të deputetëve për të diskutuar projektligjet.
“Mos na mohoni të drejtën e fjalës. Nuk ka ndodhur kurrë që të gjithë deputetët e opozitës të flasin vetëm, 100 minuta. Rregullorja na ka dhënë të drejtën që të flasim 600 minuta. Opozitës nuk mund t’i mbyllet goja në një Parlament të një vendi, minimumi normal. Ju keni detyrimin që të thoni se kush është arsyeja që keni marrë këtë vendim. Doni t’i hiqni të drejtën e fjalës opozitës? Jeni aty jo thjesht për t’u bërë transmetuese e vendimeve të Konferencës së Kryetarëve”, tha Bardhi.
“Kush ju ka thënë se po të flasin deputetët përhapet virusi, ndërsa po të jesh 22 000 veta në stadium nuk përhapet:, shtoi deputeti demokrat.
Edhe Tritan Shehu ishte kundër kufizimit të minutazhit të fjalës së deputetëve, duke iu drejtuar personalisht kryeministrit Edi Rama e duke i thënë se në Shqipëri nuk është shpallur gjendja e jashtëzakonshme.
Rama u përgjigj: “Po të jetë për mua, flisni pa limit”.
Ndërsa Taulant Balla, kreu i grupit parlamentar socialist, tha: “Është rënë dakord që deri në vaksinimin e plotë të gjithë deputetëve të Kuvendit, si rregull i miratuar me konsensus nga Konferenca e Kryetarëve, kemi dakordësuar që t’i kthehemi plotësisht punës në komisione pa limite dhe është rënë dakord që të shtohet një orë për çështjet që kemi sot. Edhe Parlamenti Evropian ka limituar diskutimet në 4 orë për mbi 700 deputetë”.
