Basha i përgjigjet Ramës: Ia ke kaluar Berishës në të gjitha veset e këqija

Replika mes kryeministrit Edi Rama dhe kryetarit të PD-së Lulzim Basha nga foltorja e Kuvendit.

Pas akuzave nga kryeministrit në drejtim të Bashës, kryetari i PD-së u shpreh se Rama ia ka kaluar në vese Sali Berishës (këtë të fundit megjithatë nuk e përmendi me emër, por e quajti “usta”).

Gjatë fjalës së tij, Rama u shpreh: “Ta kam thënë disa herë publikisht, por edhe privatisht, mos imito atë të foltores se origjinali është gjithmonë më i besueshëm se kopja dhe sa më shumë klith si ai i foltores aq më shumë dukesh si personazh i qajtores dhe një burrë që vë kunjën me fjalë të cilat si prind padiskutim u thua përditë fëmijëve që s’përdoren asnjëherë dhe e bën këtë në mes të 139 burra e grave të tjera dhe kush e di se sa të tjerëve që na ndjekin, është një burrë në pikë të hallit. Hallin që ke sado ta qajmë nuk ta zgjidhim dot”.

“’La voce del padrone’ ka ik te foltorja tani ka mbet vetëm ‘la voce pa padrone’”, u shpreh po ashtu kreu i qeverisë.

Në replikë, Basha deklaroi: “Ata pak student të psikologjisë që mund ta kenë ndjekur fjalën, e dinë se për çfarë fenomeni mjekësor bëhet fjalë. Quhet projektimi, e ka mendjen tek dikush tjetër dhe flet për dikë tjetër. Zemra i rreh për ustain  (Sali Berishën)  për të cilat ia ka kaluar në të gjitha drejtimet e këqija. Si është afruar asnjëherë në gjërat e mira që ai ka bërë për këtë vend. Por çfarë ka pasur të këqija dhe vese i ka pasur 500 herë më të mëdha”.

“Halli yt është se të ka mbaruar vaji i kandilit, ti këtë e di shumë mirë, e dije para 25 prillit, e di pas 25 prillit. Doje të digjje prap vajin tetë vjeçar, ja që se djeg dot më vajin tetë vjeçar. Nuk ke më me çfarë të merresh dhe e di që nuk ka më dhjamë për të shtrydhur shqiptarëve. Kështu që ke vendosur sa herë që përmende foltoren këtu, dhjetë herë?! Foltorja nuk është halli im, është halli jot , foltorja është ding-dong u, bëhu gati dhe ti për foltore sepse nuk ka foltore të të shpëtojë ty, nuk ka foltore të të shpëtojë ty”, shtoi Basha.

LEXO EDHE  Covid-19 në Kosovë, asnjë humbje jete dhe 13 raste të reja

Më tej, Basha tha se familjet shqiptare nuk kanë bukë në tryezë, ndërsa Rama flet për satelitë. Kryeministrin, Basha e quajti “nëna dhe baba e kokainës”. Basha tha po ashtu se është rritur çmimi i energjisë elektrike dhe ai i karburanteve dhe për këtë përgjegjës bëri kreun e qeverisë. “Je në krye të një kupole hajdutësh dhe më ke marrë një shef drejtues politik, kryehajdutin e OSHEE-së. Aty lidheni bashkë”, tha kryetari i PD.

Në fund të fjalimit të tij, permendi dhe ish-kryeministrin Berisha. “Unë nuk pështy mbi 16 vite bashkëpunimi dhe partneriteti me Sali Berishën. Nuk pështy. Sikundër nuk kam ndërmend të bëhem pjesë e procesit që kaq shumë të pëlqen ty tek citon ndoshta në çdo sens të përbaltjes, të llumit, të gënjeshtrave, të renave. Sigurisht vetëdijësohem për gabimet tona, për këto 16  vite dhe për këto 30 vite si Parti Demokratike. Pyes veten time, çfarë duhet të bëjë që Partia Demokratike të bëhet sërish valvula dhe zemra e shpresë jo thjesht për demokratët, por të paktën për ata 63% që na votuan në 1992-in. Dhe e di që ka një rrugë për të shkuar atje dhe ajo rrugë ka nisur. Fatkeqësisht për ty ajo rrugë të merr dhe ty tatëposhtë dhe nuk ka fuqi mbi tokë ta ndal. Dhe me sjelljen blastfemuese dhe mungesën totale të dijes e jo më të respektit që ke për fenë, nuk ka Zot që të shpëton”, u shpreh ai.