Thoma Gëllçi padit RTSH-në, kërkon dëmshpërblim financiar dhe pagat mujore

Ish-drejtori i RTSH-së, Thoma Gëllçi i cili u arrestua me kërkesë të SPAK për abuzime me një tender, ka paditur institucionin që ai drejtonte.

Në padinë ndaj RTSH-së, të bërë nga avokati i tij Dorjan Matlia, pretendohet se televizioni nuk ka hapur garën për drejtues pasi e ka shkarkuar Gëllçin nga detyra.

Në padi, kërkohet nga Gjykata Administrative e Shkallës së Parë të anulohet vendimi me datë 20.05.2021 të Këshillit Drejtues të RTSH-së. Po ashtu, kërkohet që pala e paditur të paguajë një shpërblim dëmi në favor të paditësit, në masën e pagave mujore që ai do të përfitonte nga dita kur është liruar nga detyra deri në momentin e fillimit të detyrës së drejtorit të ri.

LEXO EDHE  Mblidhet Komisioni hetimor për zgjedhjet

Përpos dëmshpërblimit të pagave mujore, kërkohet edhe një dëmshpërblim në vlerën 100 mijë lekë për dëmin moral dhe cenimin e reputacionit.

Po ashtu, kërkohet që pala e paditur të hapë garën për drejtuesin e ri, duke i dhënë mundësinë e rikandidimit Gëllçit,

Gëllçi dhe dy punonjës të RTSH dolën para Gjykatës së Posaçme për vlerësimin masën e sigurisë “Arrest në burg”, për abuzimin me tendera. Ishte tenderi me vlerë mbi 86 milionë Lekë për blerje të pajisjeve për kanalin “RTSH Agro” që çoi në pranga ish-drejtorin e RTSH-së.