Sekuestrimi i dy minave me telekomandë, do shiteshin për 6 mijë euro/ Ja kush është i arrestuari

Policia e Shtetit ka dhënë detaje mbi operacionin “Terminali” ku u sekuestruan 2 mina me telekomandë, të cilat do shiteshin kundrejt çmimit 6000 euro.

Policia tha se ka arrestuar shtetasin paulin Deda, 34 vjeç, me precedent të mëparshëm kriminal në fushën e narkotikëve.

“Shërbimet e Komisariatit të Policisë Durrës, në koordinim me strukturat hetimore të DVP Durrës, në bazë të informacioneve të siguruara në rrugë operative se një shtetas po tentonte të shiste mina me telekomandë, kanë organizuar punën dhe kanë finalizuar me sukses operacionin policor të koduar “Terminali”.

Në kuadër të këtij operacioni u arrestua në flagrancë shtetasi Paulin Deda, 34 vjeç, banues në Milot, Kurbin, i dënuar më parë për veprën penale “Prodhim dhe shitja e narkotikëve”.

LEXO EDHE  Alarm për përmbytje në Tiranë/ Eksperti: 16 rezervuarë janë në gjendje të amortizuar

Shërbimet e Policisë e kanë ndaluar këtë shtetas në lagjen nr.13, Plazh, Durrës, në vendin e quajtur “Terminali i autobuzëve”, dhe gjatë kontrollit fizik i gjetën dhe sekuestruan në cilësinë e provës materiale 2 mina me telekomandë të cilat ky shtetas do t’i shiste kundrejt shumës 6000 euro”, njoftoi policia.

Në bashkëpunim me Prokurorinë e Rrethit Gjyqësor Durrës, vijon puna për identifikimin e personave të tjerë të përfshirë në këtë veprimtari kriminale.