Shoqëria civile dhe aktivistë të saj protestuan pak ditë më parë në Tiranë lidhur me krizën dhe rritjen e çmimeve. Ndërkohë që një prej organizatorëve të protestës së parë, aktivisti Adriatik Lapaj, ka njoftuar se ditën e hënë në orën 17:00 do të jetë sërisht para godinës qeveritare.
Dy ditë më parë, ndërsa ndodhej përballv Kryeministrit Edi Rama në emisionin “Zonë e Lirë”, Lapaj tha se do të dilte i vetëm në protestë, ndërsa pas tij Rama e përsëriste frazën, duke ironizuar dhe hedhur batuta ndaj aktivistit.
Por a do t´i bashkohen protestës në Tiranë për krizën dhe rritjen e çmimeve, që duket se është një fakt i kryer nga Qeveria?
Deri më tani partitë kryesore në vend janë në fazën e deklaratave dhe kundërdeklaratave. Pas çdo paralajmërimi të Kryeministrit Edi Rama ka një reagim nga Partia Demokratike, herë duke propozuar plane masash dhe herë duke akuzuar Qeverinë se kriza energjitike nuk ka lidhje me atë që Kreu i Qeverisë e konsideron si “fenomen global”, por me keqmenaxhimin.
Rama është i vendosur për të rritur çmimin e energjisë, pavarësisht premtimeve se do të mbrojë konsumatorin familjar, biznesin e vogël apo shtresat në nevojë. Por gjithsesi Rama ka pohuar se rritja e çmimit, që siç e justifikon ka lidhje me krizën globale, do të mbetet edhe kur situata të stabilizohet.
Kjo do të thotë se shqiptarët do të paguajnë shumë më tepër me faturat e energjisë dhe më pasnë reaksion zinxhir edhe me ato të ujit, apo çdo produkt tjetër, duke filluar nga ato ushqimoret dhe me çdo gjë tjetër që tregtohet.
Në protestën e parë, Ambasada e SHBA në një njoftim të parë fliste për një protestë që ishte thirrur nga opozita dhe më pas porosiste shtetasit amerikanë që të ishin të kujdesshëm, referuar precipitimit të situatave të mëparshme. Më pas e njëjta ambasadë qartësoi se protesta nuk ishte thirrur nga opozita, por porosia ndaj shtetasve amerikanë mbetej e njëjtë.
Partia Demokratike reagoi duke u shprehur se ajo nuk kishte frikë të fshihej pas askujt për të thirrur protesta, ndërsa kreu demokrat Lulzim Basha, paralajmëroi organizimin e protestave të mëdha, por pa dhënë asnjë afat se kur mund të ndodhnin.
Në anën tjetër, ish-kryeministri Sali Berisha, gjithashtu ka folur për protesta dhe ka paralajmëruar se kur demokratët të ngrihen në këmbë nuk largohen nga sheshi dhe rrugët deri në rrëzimin e Edi Ramës.
Edi Rama vijon të premtojë rritjen e çmimit të energjisë, sikundër ka prerë çdo mundësi për rritje pagash dhe pensionesh.
Të vetmit që protestojnë janë qytetarë që organizohen më së shumti nga rrjetet sociale dhe pyetja që lind është: kur do të reagohet, jo nga shoqëria civile, por nga partitë politike, përballë një Qeverie që pasi shpall krizën, bën fakt të kryer rritjen e çmimeve që rëndojnë më së shumti në xhepat e çdo shqiptari, që mundohet të sigurojë jetesën përmes një page.
