Partizani nuk njeh pushim dhe planifikon një tjetër ndeshje miqësore. Të kuqtë luajtën dy ditë më parë testin ndaj Turbinës teksa fituan me rezultatin e pastër 2-0, ndërsa nesër do të zbresin sërish në fushë. Drejtuesit e klubit kanë gjetur akordin me Shkëndijën e Tetovës për të luajtur një ndeshje miqësore.
Takimi do të zhvillohet ditën e nesërme në orën 14:00 në stadiumin “Gjorgji Kyçyku” në Pogradec. Ndeshja me shumë mundësi do të transmetohet live nga RTSH-ja për të gjithë tifozët e Partizanit që duan të ndjekin nga ekrani skuadrën e tyre.
Ky test do t’i shërbejë trajnerit Daja për të gjetur skemën e duhur që pritet të përdoret edhe në kampionat. Pas 4 javësh të zhvilluara deri më tani, të kuqtë renditen në vendin e 7 me 3 pikë dhe nuk kanë shijuar ende fitoren e parë. Takimi i radhës në “Abissnet Superiore” për Partizanin do të jetë ndaj Kukësit.
DENONCO