Kryministri Edi Rama përmes një video në rrjetet sociale i përgjigjet pyetjeve të qytetarëve lidhur me situatën ekonomike në vend.
Rama shprehet se rritja ekonomike nuk përkthehet në rritje të pagave dhe pensioneve, të cilat nuk mund të rriten siç mund t´i dojë qejfi ndokujt. Rama u shpreh se nëse do të ecet me logjikën e rritjes së rrogave dhe pensioneve, meqë ka rritje ekonomike, atëherë në Gjermani, pensionet duhet të ishin 20 mijë euro në muaj.
Lidhur me krizën energjitike të paralajmëruar prej tij, Rama tha se Qeveria do të bëjë çfarë të jetë e mundur për të mbrojtur konsumatorin familjar.
“Çmimin e vendos tregu, e vendosin bursat. Sot çmimi i blerjes së energjisë është shumë më i lartë,ndaj dhe rritja e çmimit të energjisë do të rritet. Ne nuk e shesim energjinë për qejf, ndërkohë e blejmë energjinë kur nuk e mbulojmë dot furnizimin me energji”, tha Rama.
Kryeministri u shpreh se vetëm në komunizëm apo vendet diktatoriale, çmimet i përcakton shteti, pasi në shoqëritë demokratike ato i përcakton tregu dhe bursat.
Rama shprehet se kriza energjitike është në të gjithë botën dhe se është e pashmangshme për vendin tonë.
“Ne prodhojmë kur kemi reshje të mjaftueshme dhe mbushen hidrocentarlet dhe blejmë kur ka thatësirë sidomos kur është e zgjatur në kohë thatësira. Shqipëria është e varur njëlloj si të gjithë vendet e tjera nga çmimet e tregut ndërkombëtar”, ka thënë Rama.
Pyetjes se pse duhet që kostoja e vendeve të zhvilluara si Spanja dhe Gjermania duhet të krahasohen me rrogat në vendin tonë, por Rama është shprehur se çmimet e bursës për energjinë në tregun ndërkombëtar janë të njëjta.
“Çmimet e bursës së energjisë në tregun ndërkombëtarë ku Shqipëria blen energji Shqipëria nuk bën ndonjë dallim me vendet e tjera në raport me rrogën, ne nuk kemi bërë krahasim të fuqisë blerëse por kemi informuar mbi influencën e çmimeve të energjisë elektrike në të gjithë tregjet ndërkombëtare në këtë krizë që ka prekur të gjithë vendet”, ka theksuar Rama.
Në përgjigjet e tij për komentuesit, Rama është shprehur se vendi ynë nuk e prodhon sasinë e energjisë që përdor ndaj është e detyruar që të ndjekë tregjet ndërkombëtare.
Sipas tij çmimi i energjisë për familjarët është nën koston reale dhe kjo është falë masave të marra për mbrojtjen e konsumatorit.
“Shqipëria nuk e prodhon sasinë e naftës që përdor, ajo që prodhon është e cilësisë së naftës së rëndë që shkon kryesisht në tregun ndërkombëtarë për tu përdorur në industrinë e bitumit. Rreth 600 mijë ton që përdoren në vendin tonë janë nënprodukte që vijnë nga importi.
Nafta dhe në Shqipëri gjenerohet dhe prodhohet nga subjekte private që e blejnë sipas çmimeve të bursës në tregjet ndërkombëtare.
Ne prodhojmë vetë vetëm një pjesë të energjisë që prodhojmë dhe kjo bën që të kemi një çmim të rregulluar dhe jo të liberalizuar. Edhe sot që flasim çmimi i energjisë për familjarët është nën koston reale, falë subvencionimin nga shteti dhe për familjarët dhe biznesin e vogël çmimi është nën koston reale”, u shpreh Rama.
