Ish-Kryetari i Këshillit Kombëtar të PD-së, Bujar Nishani, përmes rrjeteve sociale, ka njoftuar se do t´i bashkohet “Foltores” së Gjirokastrës, atje ku ish-Kryeministri Sali Berisha do të zhvillojë takimin e rradhës me anëtarësinë e demokratëve.
Në takimin e Gjirokastrës, pritet të jetë i pranishëm edhe deputeti Tritan Shehu, njëherazi, drejtues politik i PD për Qarkun e Gjirokastrës, deputeti Flamur Noka, por edhe kreu i degës së PD-së, Dasho Aliko.
Ndërkohë, Nishani në postimin e tij shkruan se do t’ju bashkohem demokratëve të Gjirokastrës në Foltoren e Z. Berisha!
“Qyteti simbol i trashëgimisë dhe bukurisë sonë kulturore, jetë e mót ka qenë edhe simboli i patriotizmit dhe ndershmërisë njerëzore.
Të gjithë bashkë për t’u bërë më të fortë dhe fitimtarë”, shkruan Nishani.
Më herët, lideri historik demokrat, Sali Berisha njoftoi se ku do të mbahet Foltorja e Gjirokastrës.
“Nesër, ditën e mërkurë me datën 6 tetor në ora 18:00 në sallën e Hotel Olimpik të qytetit të Gjirokastrës do mbahet “Foltorja: Për një Parti Demokratike më të bashkuar, më të fortë, më të hapur”.
Ftoj demokratet dhe demokratët e Gjirokastrës të marrin pjesë. Vetëm të bashkuar fitojmë!” shkruan Berisha.
