Një alarm është dhënë globalisht pasi të dhënat personale të miliarda përdoruesve të Facebook, duket se janë në dispozicion për hakerët. Kjo vjen në një kohë kur gjiganti teknologjik bashkë me platformat e tij, Instagram dhe WhatsApp ka rënë në të gjithë botën.
Raportet që kanë dalë në dritë flasin për shitjen e të dhënave të 1.5 miliardë përdoruesve në një forum të njohur të hakerave, sipas NewsWeek. Në fakt, një blerës potencial thuhet se është i interesuar të blejë të dhënat e një milion përdoruesve, me shumën që arrin në 7.5 milion dollarë.
Në një postim, shitësi pretendon se ai përfaqëson një kompani të madhe në të cilën punon për të marrë të dhëna nga Facebook. Ai gjithashtu vëren se kompania ka mbi 18,000 klientë dhe ka funksionuar për të paktën katër vjet. Në të njëjtën kohë, ai duket se thekson se “ne jemi një kompani ligjore”.
Në të njëjtën kohë është konfirmuar se Facebook dhe Instagram janë tërhequr nga Sistemi i Emërtimit të Internetit (DNS), ndërsa emrat e domain-ve Facebook, Instagram dhe WhatsApp janë regjistruar për shitje. Për më tepër, gazetarja e teknologjisë, Sira Frenkel citoi burime pranë kompanisë, të cilët janë shprehur se nuk mund të futen në zyra.
Aksionet e Facebook kanë rënë 5.2% sot, duke i kushtuar Mark Zuckerberg rreth 7 miliardë dollarë pasuri. Kjo është goditja e dytë për Facebook, pasi vetëm pak orë më parë, u përball me akuza nga një ish punonjëse e saj, e cila tha se kompania kishte ndihmuar në përhapjen e gjuhës së urrejtjes në këmbim të fitimeve.
