Elbasani është tronditur pasditen e sotme nga një tjetër ngjarje e rëndë. Dy persona, Ardian Subashi dhe Lulzim Bitri janë qëllua me armë zjarri. Bitri ka humbur jetën, ndërsa Subashi ka pësuar vdekje klinike.
Ardian Subashi (Çollaku) në 26 maj të vitit 2015 u arrestua nga efektivët e policisë, në qendër të qytetit të Elbasanit. Një ditë para arrestimit ai ishte shpallur në kërkim ndërkombëtar nga Interpol Tirana, pasi Gjykata e Modenas, e ka dënuar me 23 vjet e 3 muaj e 17 ditë burgim për veprat penale të “Shfrytëzimit të prostitucionit” dhe “Prodhimit dhe mbajtjes pa leje e armëve luftarake dhe e municionit” parashikuar nga nenet 110 dhe 600 të Kodit Penal Italian. Po ashtu, Subashi ka qenë edhe subjekt i OFL ku vitin e kaluar së bashku me 3 persona të tjerë u është kërkuar deklarimi i pasurisë.
Lulzim Bitri ka qenë i dënuar me 4 muaj burg nga shteti maqedonas pasi ishte i përfshirë në një përplasje me armë në Tetovë në vitin 2018 ku një person mbeti i vrarë. Lulzim Bitri, pas vuajtjes së dënimit iu ndalua hyrja prej 5 viteve në Maqedoni.
Ngjarja
Sipas burimeve policore, pranë një pike karburanti në Bradashesh, afër “Rrethrrotullimit të Luleve” janë shënuar të shtëna me armë zjarri. Dy persona Lulzim Bitri dhe Ardjan Çollaku janë qëlluar me armë teksa lëviznin në këmbë. Bitri mbeti i vdekur në vend, ndërsa Subashi u transportua në spital. Në një njoftim zyrtar, policia informoi fillimisht se Subashi humbi jetën në spital. Por, më pas konfirmoi se ka pësuar vdekje klinike dhe është nisur me helikopter drejt Tiranës.
Autorët dyshohet se kanë qëlluar nga një automjet dhe më pas janë larguar me shpejtësi nga vendi i ngjarjes. Një makinë tip “Volvo” është gjetur e djegur te vendi i njohur si “Metalurgjiku“, që dyshohet të jetë përdorur nga autorët, të cilët janë ende në arrati. Një operacion kërkimi ka nisur nga policia për kapjen e autorëve dhe një grup hetimor është ngritur për zbardhjen e ngjarjes.
