Mediat britanike publikuan pjesë të një skenari, sipas të cilit emigrantët e paligjshëm që kapeshin në Britani të Madhe, do të strehoheshin në Shqipëri, deri sa të shqyrtoheshin kërkesat e tyre për azil nga autoritetet britanike.
Lajmi në fjalë u publikua edhe në mediat shqiptare, ndërkohë që ka ardhur edhe reagimi i parë nga Qeveria Rama.
“Lajmi se Shqipëria do ngrejë një qendër azilantësh për llogari të palëve të treta është absolutisht i pavërtetë. Shqipëria hapi dyert për 4 mijë afganë e jemi krenarë për këtë. Ne bëjmë detyrat tona karshi traditës e fëmijëve tanë, jo detyrat e atyre që janë më të mëdhenj e më të pasur se ne”, sqaroi Endri Fuga, drejtor i komunikimit pranë Kryeministrit.
The Sun shkruan se të gjithë klandestinët që do të kapen në Britaninë e Madhe dhe kërkojnë azil, fillimisht do të sillen në Shqipëri, ku do të ngrihet një qendër pritjeje.
Emigrantët e paligjshëm do të fluturojnë 1.500 kilometra nga Anglia, në një qendër që do ngrihet në Tiranë, ndërsa kërkesat e tyre janë duke u përpunuar nga autoritetet britanike.
Priti Patel, sekretare për çështjet e Brendshme në Britaninë e Madhe, shpreson se ky vendim do të pengojë ata persona që planifikojnë të bëjnë këtë udhëtim të rrezikshëm.
Zyrtarët në Londër dhe kryeqytetin shqiptar Tiranë thuhet se janë afër arritjes së një marrëveshjeje për qendrën e përpunimit të emigrantëve ilegalë.
Shefi i shtabit të kryeministrit Boris Johnson, Dan Rosenfield është një nga njerëzit kryesor që po merret me këtë çështje dhe diplomatët e Ministrisë së Jashtme po ndihmojnë.
Një burim i brendshëm tha: ‘Sekretarja e Brendshme e ka bërë të qartë se ajo dëshiron që kjo qendër të ngrihet. Negociatat janë në një fazë teknike. Tani kemi detajet siç janë vendndodhja dhe numrat e saktë që do të dërgohen në Shqipëri’.
Detajet/ Jo vetëm afganët, në Shqipëri do të strehohen edhe emigrantët që kapen në Angli
