Gjykata e Krimeve të Rënda në Old Bailey në Londër caktoi masën e sigurisë “arrest me burg” për 36-vjeçarin shqiptar, Koçi Selamaj, i cili dyshohet për vrasjen e mësueses angleze Sabina Nessa 28 vjeçe.
Selamaj, ish-shpërndarës picash, përmes një video nga burgu, ka deklaruar në seancë vetëm gjeneralitetet e tij, emrin dhe datën e lindjes.
Në seancën e mëparshme gjyqësore një ditë pasi iu ngritën akuzat, avokati mbrojtës tha se klienti i tij nuk e pranon akuzën e vrasjes.
Prokurorja Alison Morgan QC i tha gjykatës se Sabina Nessa është goditur me një objekt rreth 60.96 cm dhe se sulmi ishte i paramenduar. Mirëpo, arsyet e vrasjes nuk kanë dalë ende në dritë.
“Kemi të bëjmë me një sulm ku është përdorur dhunë në një nivel të lartë me paramendim”, tha prokurorja Morgan.
Nga hetimet rezulton se Sabina mbrëmjen e 17 shtatorit, u sulmua tek sa po ecte përmes një parku në drejtim të një lokali ku do të takohej me një shoqe.
Trupi i saj u gjet 24 orë më pas afër një qendre komunitare.
Gjykatësi Judge Mark Lucraft QC vendosi për Selamajn të qëndrojë në burg deri në seancën e radhës më 16 Dhjetor kur atij do ti duhet të shprehet për akuzën e ngritur e më pas të caktohet një datë për gjykimin.
Selamaj është nga Elbasani dhe kishte 5 vjet që ishte martuar me një rumune. Ai dhe familja e tij kishin emigruar fillimisht në Greqi.
