Shërbimi për Çështjet e Brendshme dhe Ankesat ka nisur hetimet mbi ngjarjen e rëndë ku mbeti i vrarë nënkomisari Saimir Hoxha.
Nga raportimet mësohet se SHÇBA do të verifikojë të gjitha procedurat që janë ndjekur në operacionin anti-kanabis, planin operacional për asgjësimin e lëndës narkotike si dhe nëse duhej të kishte forca mbështetëse.
Mësohet se nga SHÇBA është marrë dokumentacioni i plotë nga Policia e Lezhës lidhur me operacionin, ndërsa pritet marrja në pyetje e dy efektivëve të tjerë që ishin bashkë me Saimir Hoxhën në këtë operacion. Burimet bëjnë me dije se hetimi nga SHÇBA pritet të hedhë dritë mbi veprimet e policisë dhe zbatimin e standardeve dhe procedurave në rastet e operacioneve të tilla.
Ngjarja e rëndë ndodhi mëngjesin e së martës kur tre efektivë ndaluan në një postbllok të bërë aty për aty tre të rinjtë. Dy prej tyre pranuan të japin dokumentet e identifikimit dhe u kontrolluan nga efektivët, por 21-vjeçari Aldi Rama nga brendësia e makinës qëlloi për vdekje nënkomisarin Hoxha.
