Ish-Kryeparlamentarja Jozefina Topalli, e ftuar në emisionin “Të Paekspozuarit” në MCN TV, ka folur për zhvillimet e fundit në Partinë Demokratike dhe luftën që ka nisur mes Bashës dhe Berishës.
Topalli deklaroi se do të kishte dashur që Berisha të fliste për dështimet e Lulzim Bashës shumë më herët. Megjithatë ajo është dakord me të gjithë konstatimet që Berisha bën sot.
“Basha ka marrë peng jetën politike. Do të kisha dashur që këtë fakt, të dështimeve të panumërta të tij, ta kisha dëgjuar më parë nga Berisha. Por, jam dakord me thelbin, janë gjëra që i kemi thënë prej vitesh“, tha Topalli.
Lidhur me vendimin e Bashës për të përjashtuar Berishën, Topalli tha se e priste, sepse është në vijësjelljen e Bashës gjatë të gjithë karrierës së tij politike, duke e quajtur “besëprerje”.
“Po e dëgjoja me vëmendje fjalimin, po bënte fjalimin dhe po i thurrte lavde Berishës. Kur po fliste me superlativa, e kuptova… Ai gjatë të gjithë jetës politike thotë të kundërtën e asaj që bën. Vendimi është krejt ilegjitim dhe nuk qëndron.
Ai bëri publike atë që ka bërë për vite me rradhë në Partinë Demokratike. Në këtë aspekt nuk më zhgënjeu. Për opinionin publik, janë gjëra të paparashikueshme. Edhe arsyetimi i tij është në kontradiksion me zhvillimet.
Kam qenë e vetmja që kam thënë gjithmonë, që në PD vendimet i merr Basha, pavarësisht se njerëzve u thotë i ka marrë vendimet dikush tjetër. Deklarata e tij, duke thënë që ishte vendim i vështirë, është e pështirë. Ai ka çdo gjë dhuratë nga Berisha, pa asnjë kontribut në politik. Besëprerje, që nuk e kemi në ndërgjegjen tonë ne shqiptarët. Ne edhe në raport me të huajt tregohemi njerëz të besës.
Cfarë ka ndodhur? Ajo që kemi thënë, që është në një sintoni të padiskutueshme, të përhershme, me Edi Ramën.
Kur ka përjashtuar njerëz të panumërt nga PD, e ka bërë pas marrëveshjes me Edi Ramën. Pastrimi i PD është bërë me marrëveshjen Basha-Rama. Përjashtimi nga grupi parlamentar i Berishës, është bërë 2 vite pasi Edi Rama ka pyetur Berishën a udhëton dot në SHBA.
Kjo është pjesa publike e atij që ka bërë gjatë të gjithë jetës së tij. Thika e Brutit ka filluar shumë më herët“, tha Topalli.
