Pires: Bayerni klubi më i fortë në Europë, Lewandowski meriton “Topin e Artë”

Foto: 90min

Ish mesfushori i Arsenalit dhe Francës, Robert Pires ka folur me superlativa për Bayernin e Mynihut, duke e cilësuar si skuadrën më solide dhe njëkohësisht më të fortë në Europë, teksa i dha një rol mjaft të rëndësishëm edhe menaxhimit që bën shoqëria e klubit bavarez.

“Aktualisht nuk shoh asnjë skuadër më të fortë se Bayerni i Mynihut në Europë. Janë një klub shumë solid dhe kanë në përbërje emra si Neuer, Kimmich e Lewandowski, të cilët janë më të mirët në rolet e tyre. Për më tepër, kanë një menaxhim perfekt nga shoqëria, pasi futbollistët e stafi punojnë gjithmonë në qetësi, ndryshe nga PSG-ja për shembull, ku çdo javë del nga një çështje në media”, deklaroi francezi.

LEXO EDHE  Probleme me kartonët te Partizani, “ylli” i skuadrës humbet sfidën ndaj Egnatias

Duke folur për emra të përveçëm, Robert Pires “ngriti në qiell” kanadezin Alphonso Davies dhe u shpreh se sulmuesi polak Lewandowski do të meritonte padyshim një Top të Artë për atë që ka bërë në fushën e lojës.

“Më befason Alphonso Davies me shpejtësinë e tij. Po vendos gjithmonë rekorde të reja me sprintin e tij në krah dhe për më tepër, është konstant gjatë gjithë lojës. Për Levën flasin golat e tij dhe do ta meritonte padyshim një Top të Artë për atë që ka bërë sidomos në 5 vitet e fundit”, u shpreh 47-vjeçari francez.