Partia Demokratike pritet të kërkojë në Kuvend ngritjen e 3 Komisioneve Hetimore Parlamentare. Kjo u bë e ditur në mbledhjen e Grupit Parlamentar të PD, ku mësohet se Lulzim Basha u shpreh se prioritet i partisë më të madhe opozitare do të jetë ngritja e 3 komisioneve hetimore.
Sipas burimeve, PD pritet të kërkojë ngritjen e një Komisioni Hetimor për atë që e konsideron si “Masakra Zgjedhore” e 25 prillit. Sipas demokratëve, kjo u konfirmua edhe nga raporti i OSBE/ODIHR.
Parësore për këtë komision hetimor do të jetë vjedhja e të dhënave private dhe personale të shqiptarëve, apo sikundër njihet “patronazhistët”, keqpërdorimi i aseteve dhe funksioneve publike, abuzimi me fondet e rindërtimit për qëllime elektorale, abuzimi me legalizimet në këmbim të votës. Punësimet e paligjshme në administratën publike dhe blerjen e votës.
Kërkesa e dytë ka të bëjë me një Komision Hetimor për çështjen Becchetti. Demokratët theksojnë se sot shqiptarët detyrohen të paguajnë mbi 120 mln euri për shkak të luftës personale të Edi Ramës me sipërmarrëisn italian.
Ndërkohë, Komisioni i tretë Hetimor do jetë ai për Inceneratorët, që opozita e konsideron një aferë mafioze, kriminale që përfshin zyrtarët më të lartë të shtetit shqiptar.
“Kallëzimet tona penale vazhdojnë të zënë pluhur nëpër prokurori”, raportohet të jetë shprehur Basha në mbledhjen me deputetët.
