Emri/ U kap në shtëpi bari, dënohet me dy vjet burg shqiptari

Një shqiptar, i cili kishte shkuar në Britaninë e Madhe, ndërsa para autoriteteve kishte deklaruar mbërritjen atje, për shkak të hasmërisë në Shqipëri, pas problemeve të pronësisë, u arrestua nga policia pasi u kap në një shtëpi bari, dhe u dënua me dy vite burg nga gjykata.

Policia kontrolloi godinën pas raportimeve të qytetarëve të cilët kishin nuhatur lëndën narkotike.

Shqiptari i arrestuar, sipas mediave britanike, është identifikuar si Adhurim Hoxha, babai i dy fëmijëve.

Ai u përpoq të fshihej në rimorkion e një kamioni, por policia arriti ta arrestojë.

Në godinë u gjetën 2000 bimë lëndë narkotike në një ambient të pajisur me frigorifer, kompjuter dhe shtretër. Të enjten gjykata vendosi të dënojë Hoxhën me 2 vite heqje lirie. Ai dyshohet se ishte i punësuar si kopshtar nga kultivuesit e lëndës narkotike.

LEXO EDHE  VIDEO/ Vasili: 5 vjet nga reforma në drejtësi kemi vetëm demagogji, pranojeni dështimin

Avokati Colin McCarraher u shpreh se klienti i tij kishte ardhur në Mbretërinë e Bashkuar në dhjetor të vitit 2020 për shkak të kërcënimeve që kishte marrë për një mosmarrëveshje pronësie.

Babai i dy fëmijëve kishte lënë familjen e tij në Shqipëri për të udhëtuar drejt Britanisë së Madhe. Ai kishte takuar në një lokal disa persona që i kishin premtuar punë në një kompani ndërtimi, por përfundoi duke u kujdesur për një fermë kanabisi.

McCarraher tha se klienti i tij nuk fliste anglisht dhe kishte probleme për të lexuar edhe gjuhën e tij amtare.