Partia Demokratike ka reaguar lidhur me debatet në mbledhjen e djeshme të zhvilluara në degën e PS së Shkodrës, ku socialistët kanë akuzuar Sekretarin e Përgjithshëm, Damian Gjiknuri, se postet e drejtuesve vendorë në këtë qark po i merr PSD e drejtuar nga Tom Doshi.
Enkelejd Alibeaj, nënkryetar i PD, në reagimin e tij thekson se PPP-ja korruptive Rama-Doshi-Rakipi po ndan plaçkën e masakrës zgjedhore, ndërsa shton se ndarja e politikës nga krimi prioritet kombëtar
“Prej kohësh, me fakte dhe prova, kemi paralajmëruar se si modeli i ndërtuar nga Edi Rama po përhapet si një tumor në indet e partisë që ai sundon dhe metastazat shtrihen në gjithë aparatin shtetëror.
Debatet e publikuara në media nga mbledhja e PS-së së Shkodrës, konfirmojnë se pushteti i rrëmbyer me masakrën zgjedhore në bashkëpunim me krimin, nuk i përket qytetarëve, as socialistëve, por ortakëve të Edi Ramës që blenë vota, shantazhuan, dhunuan, dhe në këmbim marrin kontrollin mbi ato institucione që i shërbejnë më mirë interesave të tyre kriminale.
Këto rrëfime janë prova më e qartë se si partneriteti i pakicës plaçkitëse Rama, Doshi, Rakipi, funksionin si një PPP korruptive dhe kriminale, në kurriz të familjeve shqiptare. Pak ditë më parë ata bashkuan mandatet e vjedhura për të konfirmuar ortakërinë e tyre parlamentare, jo për të zgjidhur çështjen e papunësisë, gjendjen e rëndë ekonomike apo korrupsionin që cënon të ardhmen e Shqipërisë, por për të nginjur babëzinë e tyre në dëm të qytetarëve.
Përballja me këtë model është detyrë imperative për Partinë Demokratike dhe për shoqërinë shqiptare, sepse ç’kapja e shtetit nga krimi dhe korrupsioni janë e vetmja mënyrë për t’u dhënë fëmijëve tanë një të ardhme më të mirë”, tha Alibeaj.
