“Loja” e plehrave/ Bashkia e Durrësit rihap “tenderin”, por katërfishon fondin duke e çuar nga 2.5 në 10 milionë euro

Nga BoldNews.al

Depozitimi i mbetjeve urbane të qytetit të Durrësit ka sjellë një nga vendimmarrjet më të dyshimta të pushtetit lokal: dhënien e miliona eurove koncesionarit të Sharrës. Një vendimmarrje që Emirjana Sako po mundohet që ta marrë me sa më pak dëme për veten dhe njerëzit e afërt. Por, në “ndihmë” i ka ardhur edhe qeveria, e cila ka miratuar një VKM që e ndihmonte këtë bashki në përballimin e kostos financiare.

Megjithatë, sa vjen dhe laku po ngushtohet, pasi gjithkush po mundohet të “lajë gojën”. Para pak ditësh, BoldNews.al publikoi një investigim se Bashkia e Durrësit kishte hapur një tender me vlerë rreth 2.5 milionë euro për depozitimin e mbetjeve. Një tender i thënçin, pasi nuk do të bëhej asnjë procedurë e tillë, pasi ishte parashikuar një marrëveshje. Por, vetëm pak ditë më parë, ky “tender” u anulua. Arsyeja? Ndoshta shuma prej 2.5 milionë eurove nuk i ka bindur koncesionarin.

Faksimile: Bashkia e Durrësit ka parashikuar që depozitimi i mbetjeve të ketë një vlerë plot 10 milionë euro, nga 2.5 mln që ishte

Dhe, pak ditë nga ky anulim, Bashkia e Durrësit ka rihapur një tjetër procedurë, kësaj herë me vlerë financiare 4 herë më të lartë. Sipas dokumenteve që disponon redaksia jonë, Sako ka urdhëruar ribërjen e tenderit me objekt “depozitimi i mbetjeve urbane, Bashkia Durrës”. Në dokumentin e mësipërm thuhet se fondi limit i këtij tenderi është plot 1,148,864,000 lekë, ose duke i shtuar edhe TVSH-në mbi 10 milionë euro. Mësohet se data e publikimit është në 10 shtator 2021, ndërkohë që koha e zhvillimit të procedurës do të jetë në muajin shtator 2021.

Në dokument thuhet se kodi është “shërbime pastrimi”, teksa një detaj shumë i rëndësishëm është se tipi i procedurës do të jetë “me negocim, pa njoftim”. Pra, do të negociohet drejtpërdrejt me koncesionarin, i cili po luan si “macja me miun” me Bashkinë e Durrësit. Duke qenë pa konkurrencë, Landfilli i Sharrës ka ulur disa herë traun, duke mos lejuar depozitimin e mbetjeve. Madje, një lojë e tillë u bë në kulmin e sezonit turistik. Dhe, tashmë po mundohet që të rrisë në maksimum koston e depozitimit.

LEXO EDHE  Laboratorë dr*ge, automjete luksoze, ar dhe miliona euro/ Arrestohen 64 persona në Bruksel

Pak ditë më parë, BoldNews.al publikoi një tjetër hulumtim për lojën me plehrat e Durrësit. Sipas dokumenteve që siguroi redaksia jonë, Bashkia e Durrësit ka anuluar procedurën tenderuese për depozitimin e mbetjeve urbane. Njoftimi është bërë në Agjencinë e Prokurimit Publik, ku Emirjana Sako, u tërhoq nga tenderi. Tërheqja ngjasonte më shumë me një lojë të Sakos, teksa me të drejtë ngritëm disa pyetje: A mos ishte kjo procedurë mburojë e marrëveshjes me këtë landfill? A u bë formalisht për të mbyllur gojët e liga dhe për të vijuar për t’i dërguar mbetjet në Sharrë me marrëveshje të drejtpërdrejtë me koncesionarin? Duket se disa nga pyetjet që ngritëm morën përgjigje me veprimet e fundit.

Në dokument, Sako shkruante se arsyeja e anulimit, sipas Bashkisë së Durrësit, është bazuar në Ligjin Nr. 162/2020, datë 23.12.2020 “Për Prokurimin Publik”, Neni 98, pika 1. “Në procedurat me një fazë nuk është dorëzuar asnjë ofertë e përshtatshme”, shkruan Bashkia e Durrësit.

Por, çfarë oferte priste Bashkia e Durrësit? Të konkurronte landfilli i Maliqit, i Bushatit apo ai i Bajkajt në Delvinë? Apo ndonjë ofertë nga incenerëtori i Elbasanit dhe Fierit? Por, a nuk kanë pronarë të njëjtë? Me shumë gjasa, siç edhe e kishim parashikuar, procedura e tenderit të mëparshëm u bë formale, për t’i hapur rrugë dërgimit të mbetjeve në Sharrë sipas kushteve të vendosura nga koncesionari. Dhe, në këtë situatë, Sako do të justifikohej se “unë e bëra tenderin, asnjë firmë nuk dha ofertë”.