Lulzim Basha i është përgjigjur tezave të hedhura nga Sali Berisha, që ka folur për referendum lidhur me vendimin e kryetarit të PD që përjashtoi ish-kryeministrin nga grupi parlamentar demokrat.
Basha theksoi se “s’ka për të pasur kuvend të PD që shqyrton vendimet e qeverisë amerikane”.
“Për 8 vite me radhë, Edi Rama më ka akuzuar për kukull të Berishës, dje Sali Berisha më ka akuzuar për peng të Edi Ramës. E para është gënjeshtër e dyta s’do të ndodhë kurrë. Të dyja janë dy anë të së njëjtës medalje. PD po ecën përpara. PD do ti prijë betejës popullore për ndryshime që vjen vetëm përmes largimit të këtij regjimi dhe kthimit të vendit në shinat e demokracisë të cilat sigurojnë një jetë më të mirë për çdo shqiptar. Ky është misioni i Partisë Demokratike. Ky është misioni i çdo demokrati, ky është misioni im dhe këtij do ti qëndroj me përkushtim deri në arritjen e objektivave që nuk janë thjesht partiake, por janë kombëtare”, tha Basha në një prononcim për gazetarët jashtë selisë së PD-së.
“Sa i përket pretendimeve për referendume dhe kuvende, kuvend të PD për të marrë në shqyrtim vendimet e qeverisë amerikane nuk ka për të pasur. Objektivat tona janë përballja me Edi Ramën dhe regjimin e tij dhe energjia jonë është e fokusuar këtu. Nuk ka për të pasur kuvend të PD që shqyrton vendimet e qeverisë amerikane”, shtoi kryetari i PD-së.
