Kryedemokrati, Sali Berisha, ka reaguar pasi SPAK i ka dërguar një fletëthirrje për t’u paraqitur në kuadër të hetimeve mbi ngjarjet e 21 janarit 2011.
Në një deklaratë për mediat, pas mbledhjes së Grupit të PD-së, Berisha tha se nuk e ka marrë ende fletëthirrjen zyrtare, por theksoi se është i hapur për çdo hetim.
“Nuk kam marrë asnjë fletëthirrje. Për faktin e thjeshtë se Alfred Greca, ua jep gazetarëve para se të ma çoj mua. Nuk kam asnjë problem. Unë kam kërkuar hetim, prokuror ndërkombëtar, kam kërkuar për ngjarjen. Nga 2013 që prokurorinë e ka në dorë Edi Rama, hetimin e ka penguar ai. Sali Berisha ka kërkuar prokuror ndërkombëtarë, ka kërkuar hetim, ka deklaratat e SHBA, kur Steinberg erdhi këtu, kërkuan hetimin nga polici te organizatori. Organizatorin e kane me dokumente se kush është. Unë shkoj në çdo thirrje”,- është shprehur Berisha.
Berisha ka mbajtur postin e kryeministrit gjatë demonstratës së 21 janarit 2011, kur në bulevardin “Dëshmorët e Kombit” mbetën të vrarë 4 persona dhe u plagosën disa të tjerë.
Më herët për 21 Janarin u paraqit në SPAK Lulzim Basha, i cili ishte Ministri i Brendshëm në detyrë në 21 janar 2011.
