Presidentja e Kosovës kundër “Open Balkan”: Proces i rrezikshëm që vonon integrimin europian

Presidentja e Republikës së Kosovës, Vjosa Osmani e quajti nismën e “Open Balkan” të rrezikshme dhe se e vonon integrimin evropian të rajonit.

“Këto deklarata Osmani i ka bërë gjatë një organizimi në Gjermani”, raporton RTK.

Ajo shtoi se Edi Rama, Aleksandër Vuçiç dhe Zoran Zaev përmes “Open Balkan” po përpiqen të zëvendësojnë Procesin e Berlinit:

“Open Balkan është i rrezikshëm dhe e vonon integrimin evropian, dhe provon të zëvendësojë Procesin e Berlinit, gjë që është e pamundur dhe ne nuk do të lejojmë që të ndodh”, u shpreh presidentja Osmani.

Këto vende i kanë bërë thirrje vazhdimisht Kosovës të bashkohet me Open Balkan, por këto ftesa janë refuzuar nga kryeministri Kurti.

LEXO EDHE  "Foltorja", kush janë 6 deputetët e PD që mbështesin hapur Berishën

Gjatë konferencës së përbashkët për shtyp me kancelaren gjermane Angela Merkel një ditë më parë, Kryeministri Edi Rama sulmoi qëndrimin kundër të Kosovës lidhur me nismën “Open Balkan”.  “… Është e pabesueshme që Kosova nuk e shfrytëzon sot këtë për veten e vet, por rri dhe bën teori konspiracioni për ‘Open Balkan’”, tha Rama.

Kryeministri i Kosovës, Albin Kurti iu përgjigj Ramës pas një takimi që zhvilloi me kancelaren Merkel. Ai tha se “Procesi i Berlinit është mjaftueshëm i gjerë dhe gjithashtu mjaftueshëm i thellë, që të mos ketë nevojë për variante tjera alternative”.