Çudia në Vlorë/ Nxirret në ankand arkivoli dhe kurora me lule bashkë me pije alkoolike dhe cigare

Në redaksinë e BoldNews.al ka mbërritur një informacion, i shoqëruar me dokumente për hapjen e një ankandi në Vlorë. Sipas dokumenteve, Drejtoria Rajonale e Rezervave Materiale të Shtetit, me qendër në Vlorë, ka hapur një ankand për arkivol, kurora me lule. Dhe, në të njëjtin ankand do të nxirren në shitje edhe pije alkoolike. Një ankand i veçantë, që vetëm në Vlorë mund të ndodhë.

Faksimile: Dokumenti i ankandit, i publikuar në Agjencinë e Prokurimit Publik

Sipas dokumenteve që disponon redaksia jonë, rezulton se shitës janë Rezervat e Shtetit, e cila në datën 6 tetor 2021, në orën 11.00 do të shesë disa sende të sekuestruara dhe konfiskuara. Sipas tyre, do të shiten mallra të ndryshëm, portofola dhe çanta të ndryshme, syze optike prodhim kinez, skrap bakri, dorashka pune dhe jelek fosforeshent.

LEXO EDHE  Pamje se si xhandarmëria serbe vrojton Policinë e Kosovës në Jarinjë

Në të njëjtin ankand do të shiten edhe pije të ndryshme alkoolike vendi dhe importi me pullë fiskale. Gjithashtu edhe konfeksione të ndryshme, paketa cigare me pullë fiskale, detergjente të ndryshëm si dhe vaj motori, antifrizë dhe sprajt kroskoti.

Por, e veçanta e këtij ankandi është arkivoli dhe kurora me lule, ku të interesuarit do të kenë mundësi që ta shoqërojnë me pije alkoolike dhe cigare. Sipas dokumentit, mallrat kanë kaluar në pronësi të shtetit, të konfiskuara si pasojë e kundërvajtjes administrative, përshkruar në objektin e shitjes së këtij ankandi. Për informacion, arkivoli dhe kurore me lule do të nxirren në ankand me një vlerë prej 1,740 lekësh të rinj.