Çlirim Gjata, ish-anëtar i Kryesisë së PD, u shpreh sot se përplasja mes kreut demokrat Lulzim Basha dhe ish-Kryeministrit, Sali Berisha, mund të çojë deri në shpërbërjen e kësaj force politike.
Në një intervistë për Syri TV, Gjata tha se primare aktualisht është se si mund të ndalet kjo që po ndodh me Partinë Demokratike.
“Lufta brenda PD duhet të ndalojë. Sepse mund të ndodhë se edhe nëse administrata aktuale amerikane mund të mbështesë 100 % në zgjedhjet e ardhshme Partinë Demokratike, pyetja që shtrohet është: a do të kemi ne PD atëherë? Ndaj dhe si Basha edhe Berisha duhet të gjejnë mënyrën se si të ndalet kjo.
Vendimi i Bashës ishte i gabuar, kreu i PD duhej të kalonte çështjen në votim në forumet e partisë. Të votohej në mënyrë të fshehtë, nëse votohej pro largimit, atëherë Berisha do të largohej, nëse jo ky ishte vendimi i forumeve të PD”, tha Gjata.
Sipas tij, ndaj SHBA duhej rezistuar me metoda demokratike, as me protesta dhe as me forma të tjera si ato të Italisë në vitet 1970, por të kërkohej transparencë, të kërkohej çdo dokument. PD është në një situatë mjaft të rëndë, duhej që Kryesia e PD të merrte një vendim”, tha Gjata.
Sipas tij, ashtu si Basha edhe Berisha ka gabuar në 30 vjet politikë, por kjo që po ndodh me PD nuk ka ndodhur kurrë më parë dhe sot jemi në atë situatën që ne nuk e dimë a do të mbetet gjë nga Partia Demokratike, nëse vijon kjo përplasje.
“Basha arriti të ruajë unifikimin e PD pas humbjes së zgjedhjeve, por me vendimin për përjashtimin e Berishës kjo u prish”, tha Gjata, duke shtuar se humbja erdhi për shkak të masakrës elektorale.
Gjata tha se Basha mund të kthejë kredibilitetin e PD vetëm nëse atë vendim e kalon në forumet e partisë.
“S´mund të merret një vendim pa prova, madje sot duhet t´a rishohë atë vendim, duhet të shkojë drejt një vendimmarrjeje të fshehtë”, tha Gjata.
