Nga e hëna deri të shtunën, referuar shifrave zyrtare të Ministrisë së Shëndetësisë, humbën jetën nga Covid-19, 24 pacientë.
Dita me numrin më të lartë të viktimave ishte e mërkura ku u regjistruan 5 humbje jete dhe 1079 raste të reja.
Sipas të dhënave zyrtare të Ministrisë së Shëndetësisë, përgjatë javës, janë regjistruar 5165 raste të reja.
Në Shqipëri prej disa muajsh po mbizotëron varianti Delta i Covid-19, i cili ka një përhapje më të madhe dhe sipas ekspertëve prek kryesisht të rinjtë.
Bazuar në shifrat e publikuar një ditë më parë në spitalet Covid po trajtohen 175 pacientë, 33 prej të cilëve janë në gjendje të rënduar.
Gjatë kësaj jave, referuar publikimeve, Shqipëria u përfshi në zonën e kuqe, çka do të thotë se nuk konsiderohet më një vend i sigurtë për pandeminë, nga Bashkimi Europian.
Ndërkohë që procesi i vaksinimit po vijon, Qeveria dhe Komiteti teknik ka paralajmëruar aplikimin e vaksinimit me detyrim për mjekët, infermierët, mësues e petagogë, punonjësit e administratës publike, si dhe studentët. Megjithatë ende nuk ka akte ligjore për t´a kthyer me detyrim vaksinimin, në Tiranë një ditë më parë u organizua një protestë.
Sipas ekspertëve të shëndetësisë, pranë Qeverisë, për personat që nuk do të vaksinohen, mund të kërkohen testime çdo 3 apo 5 ditë. Ndërkohë që ekspertë të pavarur i kanë bërë thirrje Qeverisë që të aplikojë vaksinat e certifikuara nga EMA, si dhe të shtojë testimet si e vetmja mënyrë për të ndërprerë zinxhirin e transmetimit dhe të vendoset nën kontroll pandemia.
