Vrasja e 23-vjeçares Sabrina Benga, në shtëpinë e prindërve në Zhupan të Fierit nga ish bashkëshorti, ishte një krim i paralajmëruar. E reja ishte e pajisur me urdhër-mbrojtjeje. Një vit më parë autori Elton Metaj, i mbajti peng për gati 5 orë dhe u desh ndërhyrja e RENEA-s që ai të dorëzohej dhe të lirohej familja.
Prej asaj kohe, ai ndodhej prapa hekurave deri në korrik të këtij viti kur dhe u lirua.
Vitin e kaluar, Gjykata e Fierit kishte marrë vendim të mbyllte 31-vjeçarin në psikiatri pas ekspertimit psikik që i kishin bërë mjekët dhe që kishin dalë në konkluzionin se i arrestuari vuante nga sëmundje psiqike dhe ishte i paparashikueshëm në veprimet që kryente ndaj të tjerëve. Akt ekspertiza e kishte nxjerrë të papërgjegjshëm.
Në këtë kuadër, Prokuroria e Fierit kishte kërkuar zëvendësimin e masës së sigurisë nga ‘arrest me burg’ në mbylljen e spitalit psikiatrik të Zaharisë në Krujë. Dhe gjykata e Fierit kishte pranuar kërkesën e prokurorisë.
Në muajin korrik 2021, avokati Kujtim Cakrani ka kërkuar ndryshimin e masës nga izolim në spital në ndjekjen e mjekimit ambulator në ambientet e shtëpisë.
Kërkesa është bërë në gjykatën e Fierit dhe gjyqtari që shqyrtoi dosjen ishte Pirro Sota.
Në datën 20 korrik 2021, gjyqtari ka vendosur që autori të dilte nga spitali psikiatrik dhe shërbimin mjekësor ta merrte në shtëpi.
Vetëm një muaj e pak ditë pasi doli nga burgu, Elton Metaj ka udhëtuar drejt fshatit Zhupan të Fierit për të ekzekutuar ish-bashkëshorten me të cilën kishin dhe një fëmijë dy vjeç.
Elton Metaj, ishte proceduar për akuzën e kanosjes me armë ndaj vjehrrit dhe kunatit, dhunë ne familje, mbajtje pa leje të armëve të zjarrit dhe kundërshtim të forcave të rendit.
