Kreu i LZHK, deputeti Dashamir Shehi, ka komentuar çështjen e shpalljes së ish-kryeministrit Sali Berisha si ‘non grata’ në SHBA.
“Unë gjykoj që kjo është një histori që duhet trajtuar thjeshtësisht, pa ekzagjerime dhe politizime.
Nëse ka elemente korrupsioni, le të merren ata që merren me korrupsionin. Sepse gjithkush do të mbajë hallin e vet.
Përsa i përket temës politike, Berishën politikisht e gjykon koha. Duhet gjykuar me gjakftohtësi. Gjykimin politik e bëjnë zgjedhjet. Kjo është mënyra për ta diskutuar këtë çështje”, tha Shehi në emisionin A-Show.
Ai u shpreh se ne jemi duke i bërë qejfin Edi Ramës me këtë zhurmë, pasi peshon mbi opozitën.
“Edhe Berishës i është bërë një elozh i madh sepse u rikthye dhe u bë qendra e politikës.
Unë them që ta gjykojmë me gjakftohtësi dhe ta rikthejmë në normalitet. Le të vijë në parlament Berisha, pasi ka të drejtën e vet.
Berishën nuk po e akuzojnë se ka drejtuar keq politikën shqiptare. Por politikisht të gjykon koha. Prandaj po ngremë një zhurmë të kotë dhe po bëjmë lojën e Edi Ramës”, theksoi Shehi.
Shehi thekson se fronti opozitar duhet të bashkohet, për të rrënuar Ramën.
“Zgjedhja më e keqe për opozitën është bashkëqeverisja. Ne duhet të bashkëpunojmë në tema që kanë nevojë për bashkëpunim mbarëkombëtar. Kemi nevojë për ligj të ri zgjedhor, për Kushtetutë të re, duhet bashkëpunuar për marrëdhëniet me Kosovën, integrimin europian, stabilitetin rajonal. Ne nevojë për bashkëqeverisje nuk kemi. Duhet të mos kthehemi në Republikë që të kemi një zë.
Duhet të jemi të gjithë opozitarë kundër këtij regjimi. Rama kontrollon çdo gjë. Edhe një të huaj me kulturë ta kishim vënë në atë detyrë, do ishte bërë arrogant, e jo më një shqiptar. Opozita duhet të bëjë analizë të thellë se pse humbi, që të bëhet më e fortë. Nuk bëhesh biznesmen në këtë vend, nëse nuk ke njohje me qeverinë. Po ikin rinia, se këtu nuk ka shpresa e nuk jetohet ndershëm, pa u bërë hajdut”, deklaroi Shehi.
