“Nuk fshihem prapa mandatit, as sovranitetit. Ditën e premte, 10 shtator do të jem në Parlament”, u shpreh ish-Kryeministri Sali Berisha në emisionin “Now” në Euronews Albania, ndërsa theksoi se do të respektojë dinjitetin dhe sovranitetin.
Berisha tha se mandati i Sali Berishës është i Parlamentit të një vendi sovran.
“Unë po mbroj sovranitetin, i nënshtrohem dinjitetit njerëzor. Nuk mund të ketë zgjidhje tjetër”, tha Berisha.
Duke u kthyer pas në kohë në vitin 2011, kohën kur numëroheshin votat për Bashkinë e Tiranës mes Edi Ramës dhe Lulzim Bashës, Berisha tha se në zyrën e tij kishin shkuar një grup ambasadorësh që i kishin kërkuar të ndërprisnin numërimin.
“Ia thashë ambasadorëve, numërimi do të ndërpritet kur të hedh çelësat e sovranitetit të vendit në det. Ambasadorëve i dhashë një mesazh për Edi Ramën dhe turmat që kishin rrethuar KQZ u larguan”, tha Berisha.
Ish-Kryeministri deklaroi se do të bëjë një betejë për të mbrojtur dinjitetin njerëzor, liritë e individit.
“PD nuk ka pse të angazhohet në këtë betejë, përkundrazi, unë do të angazhohem në këtë betejë dhe në betejat e PD. Kjo e fundit nuk mund të ekzistojë nëse nuk respekton dy standardet themelore: lirinë dhe dinjitetin.
Është një vendim pa prova dhe fakte, këtë ia kam kërkuar edhe Sekretarit amerikan të Shtetit, Blinken, që të publikojë provat, nëse ka, lidhur me vendimin për marrjen e vendimit “non grata””, tha Berisha.
